ఈ త‌ప్పులు చేస్తే మీరు గొప్ప‌వాళ్లు కావ‌డం ఖాయం!

 

ఈ టైటిల్ ను చ‌ద‌వ‌గానే త‌ప్పులు చేస్తే గొప్ప‌వాళ్లు కావ‌డం ఏంటి? అన్న అనుమానం మీకు త‌ప్ప‌క క‌లుగుతుంది. ఆ త‌ర్వాత ప్ర‌య‌త్నించ‌డం అంటే త‌ప్పులు చేయ‌డ‌మే క‌దా? అన్న ఆలోచ‌న చేస్తారు. అయితే మ‌నం ఇప్పుడు మ‌నం చ‌ర్చించుకుంటున్న విష‌యం త‌ప్పుల నుంచి కొత్త విష‌యాలను వేగంగా నేర్చుకోవ‌డం. జీవితం అనేది అనుభ‌వాల స‌మాహారం. మ‌న‌కు ఎదురైన అనుభ‌వాలు, స‌వాళ్లే మ‌న‌ల్ని విజ‌య‌వంత‌మైన వ్య‌క్తులుగా నిల‌బెడ‌తాయి. అయితే మ‌న సొంత అనుభ‌వాల నుంచి మాత్ర‌మే నేర్చుకుందాం అనుకుంటే విలువైన స‌మ‌యం వృధా అవుతుంది. అదే అనుభ‌వ‌జ్ఞుల అనుభ‌వాల నుంచి పాఠాల‌ను తీసుకుని వాటి ఆధారంగా ప్రయత్నం చేసి ఆ క్రమంలో తప్పులు చేసి వాటిని వేగంగా సరిదిద్దుకుంటే మంచి ఫలితాలు వస్తాయి. ఒక విజయవంతమైన వ్యక్తి జీవితం నుంచి మనం ఎటువంటి సారాంశాన్ని సంగ్రహించాం..దాన్ని ఎంత వరకూ అమలు చేయగలిగాం..అన్న రీతిలో ప్రణాళిక వేసుకుని ముందు సాగితే తక్కువ సమయంలో ఎక్కువ తప్పులు చేసి వాటికి పరిష్కార మార్గాలు కనుక్కుని స్వల్ప కాలంలోనే విజేతగా నిలిచేందుకు అవకాశం ఉంటుంది.

 

 

సమయం లేదు మిత్రమా!

 

ఈ ఆధునిక యుగంలో చేసే పనిని వేగంగా పూర్తి చేయాలి. ఏ మాత్రం ఆలస్యం జరిగినా మనల్ని పక్కకు తోసుకుంటూ వందలాది మంది ముందుకు వెళ్లిపోతారు. పోటీలో మనం వెనకబడి పోతాం. ఒక ప్రయత్నం మొదలుపెట్టినప్పుడు అది పూర్తి కావడానికి కొంత సమయం పడుతుంది. ఇందులో ఎటువంటి సందేహం లేదు. ఎందుకంటే ఒక పనిని, ఒక లక్ష్యాన్ని ఏర్పరుచుకున్నప్పుడు దాన్ని సాధించడం అన్నది అంత సులభమైన విషయం కాదు. ప్రతీ రోజూ ఏదో ఒక తప్పు చేసేస్తూ ఉంటాం. అసలు తప్పు చేస్తేనే మనం సరైన దారిలో ఉన్నట్టు. అయితే ఆ అనుభవం నుంచి పాఠాల నేర్చుకుందాం. మెల్లగా నేర్చుకుందాం అంటే ఇప్పుడు కుదిరే పని కాదు. అందుకే విజేతల జీవితాలను వాళ్ల అనుభవాలను కేస్ స్టడీస్ గా తీసుకుని వాళ్లు 2 ఏళ్లలో చేసిన పనిని మీరు 2 నెలల్లో, అలాగే వాళ్లు 20 ఏళ్లలో పూర్తి చేసిన పనిని మీరు 2 ఏళ్లలో పూర్తి చేసేందుకు ప్రయత్నం చేయాలి. అలా చేస్తేనే ఈ పోటీలో మీరు నెగ్గుకు రాగలరు. తీరిగ్గా స్వీయ అనుభవాల నుంచి నేర్చుకుందామంటే రేస్ లో మీరు చివరి నిలవడం ఖాయం. కాబట్టి సమయం లేదు పనిని ఇప్పుడే మొదలు పెట్టాలి. స్ఫూర్తి పొందాలి. ప్రణాళిక వేసుకోవాలి. తప్పులు చేయాలి.కానీ వాటిని త్వరగా చేసేసి త్వరగా విజయ శిఖరాన్ని చేరుకోవాలి.

 

 

తీసుకోవాల్సింది అనుభవాలను మాత్రమే!

 

మనం వేగంగా ఫలితాలు సాధించాలంటే విజయవంతమైన వ్యక్తుల అనుభవాలను తీసుకుని కేస్ స్టడీ చేసి ముందుకు సాగాలని మనం చెప్పకుంటున్నాం. అయితే ఇక్కడ ఒక ముఖ్యమైన విషయం ఉంది. మనం వాళ్ల నుంచి స్ఫూర్తి పొందాలి..వాళ్ల ప్రయాణాన్ని అధ్యయనం చేయాలి. అంతేకానీ వాళ్లు చేసిన పనిని మీరు కూడా చేయాలి అనుకోకూడదు. ఎవరో చేసిన పనిని నువ్వు చేస్తే ఎప్పటికీ విజేతవు కాలేవు. నువ్వు విభిన్నమైన ఒక కొత్త పనిని ప్రారంభించి దాని కోసం కష్టపడాలి. దాని కోసం విజేతల ప్రయాణంలోని అనుభవాలను అధ్యయనం చేయాలి. త్వరగా నేర్చుకోవాలి. కానీ చివరికి నీ గమ్యం, నీ లక్ష్యం నీవే. అవి వేరే వాళ్లలా ఎప్పుడూ ఉండకూడదు. నీవు చేస్తున్న పనిలో , నీ ప్రయాణంలో ఒక ప్రత్యేకత ఉండాలి. ఈ విషయాలను ఎప్పుడూ గుర్తు చేసుకుంటూ నిరంతరం లక్ష్య సాధన కోసం కృషి చేస్తే విజయం త్వరగా వరిస్తుంది.

 

 

చేసే పనిని కొత్తగా చేయడమే విజయం!

 

ఒక ప్రముఖ ఇంగ్లీష్ రచయిత చెప్పినట్టు విజేతలు ఎప్పుడూ ఎవరూ చేయని కొత్త కొత్త పనులు చేయరు..చేసే పనినే కొత్తగా చేస్తారు. ఈ మాటను ప్రతీ ఒక్కరూ గుర్తుంచుకోవాలి. ఒక లక్ష్యాన్ని, ఒక పనిని ఎంచుకుని దాన్ని విభిన్నంగా, వినూత్నంగా చేయడమే విజయం అంటే. ఫలానా పని చేసి ఒకతను విజయవంతంఅయ్యాడని మనం కూడా అలాంటి పనిని చేయాలనుకోవడం మనల్ని వైఫల్యానికి చేరువ చేస్తుంది. అతను చేసిన పనిని తీసుకో..దాన్ని కొత్తగా ఎలా చేయగలవో ఆలోచించు..అతని అనుభవాలను, తప్పులను గమనించు. వాటి ఆధారంగా తక్కువ సమయంలో విజయం సాధించు. ఇదే సూత్రం. ఒక స్వల్పకాలిక లక్ష్యం పెట్టుకుని తప్పులు జరుగుతున్నా, నిరాశ కలిగిస్తున్నా అధైర్యపడకుండా ముందుకు సాగాలి. చేయాల్సిన తప్పులు అన్నీ చేసేయ్. వాటి నుంచి విలువైన పాఠాలు నేర్చుకో. కానీ చేయాల్సింది తొందరగా చెయ్.

 

 

విద్యా విధానంలోనే దీనికి బీజం పడాలి!

 

మన విద్యా వ్యవస్థలో ఒక లోపం ఉంది. ఒక ఉపాధ్యాయుడు తాను కోర్సులో భాగంగా నేర్చుకున్న విషయాలనే విద్యార్ధులకు భోధిస్తాడు. ప్రశ్నలు, సమాధానాలు అన్నీ రెడీగా ఉంటాయి. దీంతో విద్యార్ధి కేవలం బట్టి పట్టడం, పుస్తకాలను చూసి సమాధానాలు రాయడం వరకు మాత్రమే పరిమితమవుతున్నాడు. అలా కాకుండా పాఠ్య పుస్తకాల్లో సమాధానాలు లేని కొన్ని ప్రశ్నలు ఇచ్చి వాటిని సమాధానం తీసుకురండి అన్నప్పుడు మంచి ఫలితాలు వస్తాయి. వాళ్లు సమాధానం కోసం ప్రయత్నం చేస్తారు. వెతుకుతారు.. అడుగుతారు.. ఆలోచిస్తారు..వాళ్లు తప్ప సమాధానాలే తయారు చేసి తీసుకురావచ్చు. కానీ సమాధానాన్ని వెతికే క్రమంలో వాళ్లు చేసిన తప్పులు, పొరపాట్లు, అనుభవాలు వాళ్లు విజేతలుగా నిలుపుతాయి. కానీ దురదృష్టవశాత్తూ మన దగ్గర అటువంటి విధానం లేదు. కనీసం లక్ష్య సాధకులు అయినా సరే ఈ విధానాన్ని అన్వయించుకుని గొప్పవాళ్ల జీవితాలను స్ఫూర్తిగా తీసుకుని వాళ్ల అనుభవాన్ని గ్రహించి, తక్కువ సమయంలో ఎక్కువ తప్పులు చేసి , విభిన్నంగా చేస్తే విజయాన్ని ఆపడం ఎవరి తరమూ కాదు.

 

(ఈ ఆర్టికల్ ను మీకు స్పాన్సర్ చేస్తున్నవారు) 

 

‘లిఫ్ట్’ కావాలా నాయ‌నా??

 

జీవితంలో ఉన్న‌తంగా ఎద‌గాల‌ని గొప్ప ల‌క్ష్యాల‌ను సాధించాల‌ని ప్ర‌తీ ఒక్క‌రూ కోరుకుంటారు. అయితే చాలా త‌క్కువ మంది మాత్ర‌మే గొప్ప‌వాళ్లుగా ఎదుగుతారు. మిగిలిన వాళ్లంతా అనుకోవ‌డం ద‌గ్గ‌రే ఆగిపోతారు? పైగా తాము ఎందుకు ఎద‌గ‌లేక‌పోయారో కార‌ణాలు చెపుతూ, సాకులు వెతుకుతూ త‌మ‌ను తాము మోసం చేసుకుంటూ ఉంటారు. ఇటువంటి వ్య‌క్తులు చెప్పే కార‌ణాల లిస్ట్ లో మొద‌ట‌ ఉండేది త‌మ‌కు ఎవ‌రూ లిఫ్ట్ ఇవ్వ‌లేద‌ని, ఆలా లిఫ్ట్ ఇచ్చి ఉంటే ఎక్క‌డో ఉండి ఉండేవార‌మ‌న్న‌ది. అయితే ఇటువంటి వ్య‌క్తుల‌కు అర్ధం కాని విష‌య‌మేమిటంటే అస‌లు ఎవ‌రైనా ఎందుకు లిఫ్ట్ ఇస్తారు? పోనీ లిఫ్ట్ ఇచ్చినా అర్హ‌త చూసి మాత్ర‌మే ఆ స‌హాయం చేస్తారు. ఈ ప్ర‌పంచంలో అర్హ‌త లేని వారికి, క‌ష్ట‌ప‌డి ప‌నిచేయ‌లేని వారికి ఎవ‌రూ లిప్ట్ ఇవ్వ‌రు. వెహిక‌ల్ పై లిఫ్ట్ ఇచ్చేందుకే ఒక‌టికి ప‌దిసార్లు ఆలోచించే ఈ ప్ర‌పంచంలో జీవితంలో మీకు ఎవ‌రో లిఫ్ట్ ఇస్తార‌ని, వాళ్లు మీ జీవితాన్ని మార్చుతార‌ని అనుకోవ‌డం మూర్ఖ‌త్వం మాత్రమే. సొంతంగా త‌మ‌ను తాము ఉన్న‌తంగా తీర్చిదిద్దుకుని క‌ష్ట‌ప‌డి ప‌నిచేసే వారికి మాత్ర‌మే విజ‌యాన్ని అందుకునే అర్హ‌త ఉంది.

 

 

అస‌లు మీకెందుకు అంద‌రూ స‌హాయం చేయాలి?

 

మ‌న‌లో చాలా మందికి స‌హాయం కావాల్సి వ‌చ్చిన‌ప్పుడు ట‌క్కున ఉన్న‌త స్థానంలో ఉన్న‌బంధువులో, స‌న్నిహితులో గుర్తుకువ‌స్తారు. వాళ్ల స‌హాయం తీసుకుని ఆ ప‌నిని పూర్తి చేయాల‌నో, లేక ఏదైనా ప్ర‌యోజ‌నం పొందాల‌నో ఆశిస్తూ ఉంటాం. అప్ప‌టి వ‌ర‌కూ వారితో స‌న్నిహిత సంబంధాలు నెర‌ప‌క‌పోయినా స‌రే వాళ్ల ద్వారా స‌హాయం పొందాల‌నుకోవ‌డం ఎంత వ‌ర‌కూ స‌బ‌బు అన్న ఆలోచ‌న‌న ఎవ‌రికీ రాదు. ఉన్న‌త స్థానంలో వ్య‌క్తుల ద్వారా ప్ర‌యోజ‌నం పొందాలనుకోవ‌డం త‌ప్పు కాదు. అయితే ఇక్క‌డ రెండు కీల‌క‌మైన విష‌యాలు దీనిని నిర్ణ‌యిస్తాయి. అందులో ఒక‌టి మీరు సహాయం పొందాల‌నుకుంటున్న వ్య‌క్తుల‌తో మీరు స‌న్నిహిత సంబంధాలు క‌లిగి ఉన్నారా? లేక అవ‌సరం వ‌చ్చిన‌ప్పుడు మాత్ర‌మే వాళ్లు గుర్తుకు వ‌స్తారా? ఇక రెండోది అస‌లు మీకు అర్హ‌త లేకుండా అవ‌త‌లి వ్య‌క్తులు మీకెందుకు స‌హాయం చేయాలి? మీకు స‌రైన స‌మ‌ర్ధ‌త లేకుండా వాళ్లు మీకు స‌హాయం చేస్తే వాళ్ల విశ్వ‌స‌నీయ‌త‌, న‌మ్మ‌కం దెబ్బ‌తింటాయి క‌దా? స‌రైన అర్హ‌త‌లు లేకుండా మీకు ఎంత‌టి స‌న్నిహితులైనా స‌హాయం చేయ‌లేరు. అది ఎప్ప‌టికీ సాధ్యం కూడా కాదు.

 

 

నిందించుకోవాల్సింది మిమ్మ‌ల్ని మీరే!

 

ఇక త‌మ‌కు స‌హాయం కావాల్సి వ‌చ్చిన‌ప్పుడు ఆప్తులు అనుకున్న వాళ్లు స‌హాయం చేయ‌లేద‌ని చాలా మంది నిందులు వేస్తుంటారు. త‌మ చుట్టాలు, ఆప్తులు అయ్యిండి త‌మ‌కు అవ‌స‌రం అయిన‌ప్పుడు ఎందుకూ కొర‌గాకుండా పోయార‌ని ఆవేద‌న చెందుతూ ఉంటారు. అంతేకానీ త‌మ‌లో ఉన్న లోపం ఏమిటో గుర్తించేందుకు సిద్ధంగా ఉండ‌రు. అస‌లు వాస్త‌వానికి లిఫ్ట్ వేరు రిఫ‌రెన్స్ వేరు. మీ ద‌గ్గ‌ర పెద్ద‌గా విష‌య ప‌రిజ్ఞానం గానీ అర్హ‌తులు కానీ లేకున్న‌ప్ప‌టికీ చాలా మంది మ‌న‌కు రిఫ‌రెన్స్ ఇస్తారు. ఎందుకంటే రిఫ‌రెన్స్ ఇచ్చిన‌ప్ప‌టికీ మీరు మ‌రో వేదిక వ‌ద్ద మీ అర్హ‌త‌ల‌ను, స‌మ‌ర్ధ‌త‌ను నిరూపించుకోవాల్సి ఉంటుంది. అయితే లిఫ్ట్ ఇచ్చే విష‌యంలో ఇది సాధ్యం కాదు. ఎందుకంటే ఒక వ్య‌క్తి మీకు లిఫ్ట్ ఇచ్చి మీ పురోగ‌తికి స‌హాయం చేయాలంటే మీరు అత‌ని ద‌గ్గ‌ర మీ సామ‌ర్ధ్యాల‌ను ఎంత‌గా నిరూపించుకోవాలి? ఎంత న‌మ్మ‌కాన్ని సంపాదించుకోవాలి? అర్హ‌త లేదు అనుకుంటే సొంత వారికైనా ఎవ‌రూ లిఫ్ట్ ఇచ్చేందుకు సిద్ధంగా ఉండ‌రు. ముందు మిమ్మ‌ల్ని మీరే నిరూపించుకుని త‌ర్వాత ఏదైనా చిన్న విష‌యానికి లిఫ్ట్ ను ఆశిస్తే దాని వ‌ల‌న ఫ‌లితం ఉంటుంది. అస‌లు లిఫ్ట్ నే ఆశ్ర‌యించ‌కుండా మీకు మీరుగా ఎదిగేందుకు ప్ర‌ణాళిక‌లు వేసుకుంటే మ‌రీ మంచిది.

 

 

మ‌నం ఎక్కాల్సిన లిఫ్ట్ కూడా మ‌న‌కు ఎన్నో పాఠాలు నేర్పుతుంది!

 

అపార్ట్ మెంట్ లో మ‌నం లిఫ్ట్ ఎక్కాల్సి వ‌చ్చిన‌ప్పుడు స‌రిగ్గా గ‌మ‌నిస్తే మ‌నకు ఎన్నో విష‌యాలు అర్ధ‌మ‌వుతాయి. మ‌నం వ‌చ్చేస‌రికి దాదాపు 90 శాతం సంద‌ర్భాల్లో లిఫ్ట్ మ‌న‌కు అందుబాటులో ఉండ‌దు. చాలా త‌క్కువ సంద‌ర్భాల్లో మాత్ర‌మే మ‌నం వెళ్లేస‌రికి లిఫ్ట్ రెడీగా ఉంటుంది. మ‌నం కొద్ది సేపు నిరీక్షించి ఓపిక‌తో ఉన్నాకే లిఫ్ట్ ఎక్కేందుకు వీలు క‌లుగుతుంది. లిఫ్ట్ అప్ప‌టికే ఉన్న వ్య‌క్తులు మ‌న కోసం మ‌న వెళ్లాల్సిన ఫ్లోర్ కోసం బ‌ట‌న్ నొక్కిపెట్ట‌రు. మ‌నమే మ‌న వెళ్లాల్సిన గ‌మ్య‌స్థానాన్ని నిర్ణ‌యించుకుని బ‌ట‌న్ ను నొక్కాలి. ఎందుకంటే ఎక్క‌డ దిగాల‌న్న‌దానిపై మ‌న‌కు మాత్ర‌మే స్ప‌ష్టత ఉంటుంది. ఈ విష‌యం వేరే వ్య‌క్తుల‌కు తెలియ‌దు క‌దా? అటువంటి స‌మ‌యంలో వాళ్లు మీకెందుకు స‌హాయం చేస్తారు. స‌హాయం చేయాల‌ని ఉన్నా మీ గ‌మ్యాన్ని నిర్దేశించుకోలేని మీ అస‌మ‌ర్ధ‌త‌ను గ‌మ‌నించి ఆ ప్ర‌య‌త్నాన్ని విర‌మించుకుంటారు. కాబ‌ట్టి ముందు క‌ష్ట‌ప‌డి చేస్తూ కావాల్సిన అర్హ‌త‌ల‌ను సంపాదించుకోండి. అప్పుడు లిఫ్ట్ దొరికినా దొర‌క‌కున్నా మీరు అనుకున్న ల‌క్ష్యాన్ని చేరుకోగ‌లుగుతారు.

 

( ఈ ఆర్టిక‌ల్ ను మీకు స్పాన్స‌ర్ చేస్తున్నావారు)

 

 

 

మీలో కొత్త ఉత్సాహాన్ని, ఉల్లాసాన్ని నింపే విష‌యాలు ఏంటో తెలుసా?

 

కొన్ని విష‌యాలు చూడ‌టానికి చాలా సామాన్యంగా, స‌మాజం దృష్టిలో ప‌నికిరాని అంశాలుగా క‌నిపించినా త‌ర‌చి చూస్తే వాటి నుంచి ఎన్నో జీవ‌న నైపుణ్యాల‌ను నేర్చుకోవ‌చ్చు. ఎవ‌రైనా సినిమాకు వెళ్లినా లేక క్రికెట్ మ్యాచ్ ల‌కు వెళ్లినా మ‌నం ఏ విధంగా ఆలోచిస్తాం? అందులో ఏముంది..ఏదో టైమ్ పాస్ కి, ఎంట‌ర్ టైన్ మెంట్ కోసం వెళ్లారు అనుకుంటాం. ఇంకా ముందుకెళ్లి ఎంజాయ్ మెంట్ అన్న చిన్న ప‌దంతో తీసిపారేస్తాం. కానీ అందులోనే ఒక అద్భుత‌మైన ఉత్తేజ‌క‌ర‌మైన ఉత్ప్రేర‌కం దాగి ఉంది. అది మ‌నిషికి అనుక్ష‌ణం శ‌క్తినిచ్చి రెట్టింపు ఉత్సాహంతో ప‌నిచేసేందుకు అవ‌స‌ర‌మైన ఇంధ‌నాన్ని అందిస్తుంది. ప్ర‌తీ మ‌నిషి ఏదో ఒక సంద‌ర్భంలో కాస్త నిరుత్సాహానికి, నిరాశ‌కు గుర‌వుతాడు. అలాంటి ప‌రిస్థితుల్లో మ‌న‌కు స‌రైన స‌ల‌హా ఇచ్చేందుకు లేక మ‌న‌సుకు స్వాంత‌ననిచ్చే వ్య‌క్తులు అందుబాటులో ఉండ‌క‌పోవ‌చ్చు. ఉద్వేగాలను నియంత్రించుకోలేని అటువంటి సంద‌ర్భాల్లో ఒక మంచి సినిమాకు వెళ్ల‌డం లేదా ఒక మంచి ఆట‌ను చూడ‌టం అన్న‌ది మ‌న‌లో నిరాశ‌ను పొగొడుతుంది. సినిమాలో హీరో చేసే సాహ‌సాలు నిజం కాక‌పోవ‌చ్చు కానీ అటువంటి స‌న్నివేశాలు చూస్తున్న‌ప్పుడు మ‌న‌కు తెలీకుండానే ఒక ర‌క‌మైన ఫాంట‌సీలో విహ‌రిస్తూ నిరాశ‌ను వ‌దులుకుని కొత్త ఉత్తేజాన్ని పొందుతాం.

 

 

సినిమా ఉల్లాసాన్నిచ్చే ఉత్ప్రేర‌కం!

 

ఒక సినిమాలో హీరో త‌న చేతుల మీదుగా కార్లు పోనిచ్చుకుంటాడు. మార్ష‌ల్ ఆర్ట్స్ లో త‌న‌కున్న నైపుణ్యాన్ని ప్ర‌ద‌ర్శిస్తాడు. అలానే డ్యాన్స్ లో త‌న‌కున్న నైపుణ్యాన్ని చూపిస్తాడు. ఇవ‌న్నీ సినిమా చూస్తున్న ప్రేక్ష‌కుడు ప్ర‌ద‌ర్శించ‌లేక‌పోవ‌చ్చు కానీ సినిమా ముగిసేంత వ‌ర‌కూ ఆ స‌న్నివేశాలు అత‌నిలో ఉత్సాహాన్ని నింపుతాయి. అప్ప‌టి వ‌ర‌కూ అత‌ను అనుభ‌విస్తున్న మానిసిక అల‌స‌ట‌ను, చికాకును సినిమా మ‌రిపిస్తుంది. పైగా ఎంత క‌ష్ట‌త‌ర‌మైన ప‌రిస్థితుల్లోనైనా క‌ష్టాల‌ను ఎలా ఎదుర్కోవాల‌న్న దానిపై సినిమాలోని స‌న్నివేశాలు అతనిలో ప‌ట్టుద‌ల‌ను, సానుకూల దృక్ఫ‌దాన్ని పెంచుతాయి. సినిమాను ఎంత బాగా ఎంజాయ్ చేస్తే అంత‌గా మానసిక ఉల్లాసాన్ని పొందేందుకు వీలుంటుంది. సాధార‌ణ టిక్కెట్ కొనుక్కుని తెర‌కు ద‌గ్గ‌ర‌గా సినిమా చూసే మాస్ ఆడియ‌న్స్ సినిమాను ఎంత‌గా ఎంజాయ్ చేస్తారో మ‌న‌కు అంద‌రికీ తెలిసిన విష‌యమే. వాళ్ల‌కంద‌ర‌కూ జీవితంలో ఎన్నో క‌ష్టాలు, క‌న్నీళ్లు ఉంటాయి. అయినా స‌రే అన్నింటిని చాలా తేలిగ్గా తీసుకుని జీవితాన్ని , జీవనాన్ని కొన‌సాగిస్తూ ఉంటారు. సినిమా చూసే మూడు గంట‌లే కాదు సినిమాలోని స‌న్నివేశాల నుంచి ఉత్తేజం పొంది రోజువారీ జీవితాన్ని కూడా ఉల్లాసంగా గ‌డప‌డం అల‌వాటు చేసుకుంటారు. సినిమాకు ఉన్న శ‌క్తి అలాంటిది మ‌రి. సినిమా అంటే కేవ‌లం ఎంజాయ్ మెంట్ , ఎంట‌ర్ టైన్ మెంట్ మాత్ర‌మే కాదు. లైఫ్ ను ఎలా గ‌డ‌పాలో దేన్నిఎక్క‌డ వ‌ర‌కూ తీసుకోవాలో నేర్పిస్తూ బాధ‌ల‌ను మ‌రిపించే అద్భుతమైన వినోద సాధ‌నం.

 

 

క్రీడ‌లు జీవితాన్నే మార్చేస్తాయి!

 

క్రికెట్ నే తీసుకోండి బ్యాట్స్ మెన్ బ్యాట్ తో బంతిని కొట్టేందుకు ప్ర‌య‌త్తిస్తే ప‌ద‌కొండు మంది ప్ర‌త్య‌ర్ధి ఆట‌గాళ్లు ఆ బాల్ ను అడ్డుకునేందుకు ప్ర‌య‌త్నిస్తారు. ఈ ఇరు వ‌ర్గాల మ‌ధ్య జ‌రిగే పోరు ర‌సవ‌త్త‌రంగా ఉంటుంది. ఒక‌ర్ని మ‌రొక‌రు ఛాలెంజ్ చేసుకుంటూ ప‌ట్టుద‌ల‌తో ఆడే ఆ గేమ్ చూసే వాళ్ల‌లో కూడా ప‌ట్టుద‌లను పెంచుతుంది. మ్యాచ్ చూస్తున్నంత సేపు ఆ ఉత్కంఠ మైదానంలోని ఆట‌గాళ్ల‌కే కాదు చూసే ప్రేక్ష‌కుల‌కు కూడా కొత్త అనుభ‌వాన్ని క‌లిగిస్తుంది. జీవితాన్ని చూసే విధానంలో మార్పును తీసుకొస్తుంది. ఇక ఫుట్ బాల్ ఆట‌లో బాల్ ను ప్ర‌త్య‌ర్ధి గోల్ పోస్ట్ లోకి నెట్టాల‌న్న ఆట‌గాళ్ల ప్ర‌య‌త్నం దాన్ని అడ్డుకోవాల‌నే గోల్ కీప‌ర్ ప్ర‌య‌త్నం రోమాంచితంగా ఉంటాయి. ఇరు జ‌ట్ల మ‌ధ్య ఈ పోరు చూసే వాళ్ల మ‌దిలో కొత్త ఛాలెంజ్ ను నింపుతుంది. ఆ ఆట చూసి ప్రేక్ష‌కుడు కేవ‌లం ఎంజాయ్ మాత్ర‌మే చేయ‌డు. ఉత్తేజం పొందుతాడు. ఆట‌లోని ఆ స‌వాలును జీవితానికి అన్వ‌యించుకోగ‌లుగుతాడు. ఎంట‌ర్ టైన్ మెంట్ పొంద‌డానికి, ఉత్తేజం పొంద‌డానికి ఒక స్ప‌ష్ట‌మైన తేడా ఉంది. ఆ తేడాను అర్ధం చేసుకోవ‌డంలో విఫ‌ల‌మ‌య్యే చాలా మంది సినిమాల‌ను, ఆట‌ల‌ను కేవ‌లం వినోదం అని అనుకుంటున్నారు. అది చాలా త‌ప్పుడు అభిప్రాయం. సినిమాలు, క్రీడ‌లు అనేవి మ‌న‌లో ఉత్సాహాన్ని, ఉల్లాసాన్ని నింపి మ‌న జీవితాన్ని మార్చేసే ఉత్ప్రేర‌కాలు.

 

 

వేడుక‌లు, ప‌ర్య‌ట‌న‌లు జీవిత దృక్ఫ‌దాన్ని మారుస్తాయి!

 

మ‌న‌లో చాలా మంది ఫంక్ష‌న్ ల‌కు, వేడుక‌ల‌కు వెళ్ల‌డాన్ని టైం పాస్ వ్య‌వ‌హారంగా కొట్టిపారేస్తారు. కానీ వాస్త‌వానికి వేడుక‌ల‌కు వెళ్ల‌డం అనేది జీవితం ప‌ట్ల మ‌న దృక్కోణాన్ని మారుస్తుంది. ఏదైనా ఒక ఫంక్ష‌న్ కు వెళ్లిన‌ప్పుడు అక్క‌డ విభిన్న రంగాల నుంచి విభిన్న నేప‌థ్యాల నుంచి ఎంద‌రో కొత్త వ్యక్తులు వ‌స్తారు. వాళ్ల‌తో మాట్లాడితే మ‌న‌లో ఉన్న బెరుకు పోవ‌డమే కాదు కొత్త విష‌యాలు తెలుస్తాయి. అలాగే ఆ ఫంక్ష‌న్ జ‌రిగే విధానం నుంచి స్ఫూర్తి పొంది మ‌నం కూడా అటువంటి వేడుక చేయాల‌న్న ఆలోచ‌న క‌లుగుతుంది. ఇక ఎప్పుడూ మ‌నం చూడ‌ని కొత్త ప్ర‌దేశాల‌కు, ఎన్ని సార్లు చూసినా త‌నివితీర‌ని సుంద‌ర ప్ర‌దేశాల‌కు వెళ్లిన‌ప్పుడు మ‌న‌కు మ‌నమే కొత్త‌గా ఆవిష్కృత‌మ‌వుతాం. అటువంటి పర్య‌ట‌న‌ల‌కు వెళ్లిన‌ప్పుడు రోటీన్ జీవితం నుంచి స్వాంత‌న పొంది కొత్త శ‌క్తిని పొందేందుకు అవ‌కాశం ఏర్ప‌డుతుంది. ఇటువంటి ప‌ర్య‌ట‌న‌ల‌కు వెళ్లిన‌ప్పుడు మ‌నం ప్ర‌తీ రోజూ ఎలా ఉంటామో అలా కాకుండా కాస్త విభిన్నంగా, సౌక‌ర్యంగా ఉండే ప్ర‌య‌త్నం చేయాలి.ప‌ర్య‌ట‌న‌ల‌కు వెళ్లిన‌ప్పుడు కూడా ఫార్మ‌ల్ ఫ్యాంట్, ష‌ర్ట్ ఇన్ సర్ట్ కాకుండా వ‌దులు దుస్తులు ధ‌రిస్తే మ‌న‌సుకు ఉల్లాసంగా ఉంటుంది. విజ‌యవంత‌మైన వ్య‌క్తులు టూర్ కు వెళ్లిన‌ప్పుడు వాళ్లు ఎటువంటి ఆహార్యంలో ఉంటారో ఒకసారి గ‌మ‌నించండి. రోజువారీ జీవితం మ‌న‌కు విసుగు క‌లిగించ‌కూడ‌దు అనుకుంటే కొత్త ఉత్సాహాన్ని పొందాలి అనుకుంటే మిగిలిన వారు టైం పాస్ అనుకున్నా మంచి ప‌ర్య‌ట‌న‌ల‌కు వెళ్లి రావాలి.

 

 

అన్నింటినీ తీసేసి జీవితాన్ని జీరో చేసుకోకండి!

జీవితాన్ని సంపూర్ణంగా జీవించిన‌ప్పుడు దానికి సార్ధ‌క‌త ఏర్ప‌డుతుంది. ఎవ‌రో ఏదో అన్నార‌నో లేదో ఏమైనా అనుకుంటార‌నో అన్న భ‌యంతో బెరుకుతో చాలా మంది లైఫ్ ను అసంపూర్ణంగానే జీవిస్తున్నారు. మ‌న చుట్టూ ఉన్న విష‌యాలు, జరిగే సంఘ‌ట‌న‌ల నుంచే మ‌నం ఎన్నో జీవిత పాఠాల‌ను నేర్చుకోవ‌చ్చు. ముఖ్యంగా సినిమా చూసి ఉత్తేజం పొంది జీవితాన్ని మార్చుకున్న వాళ్లు ఎంద‌రో ఉన్నారు. మ‌నం కూడా సినిమాలోని పాజిటివ్ అంశాల‌ను ఫీల్ అయితే అందులోని ఉత్తేజాన్ని అర్ధం చేసుకుంటే సినిమా చూడ‌టం అనేది టైం పాస్, ఎంట‌ర్ టైన్ మెంట్ అన్న మాటే రాదు. అలాగే క్రీడ‌ల నుంచి జీవితాన్ని కొత్త‌గా మ‌లుచుకోవ‌చ్చు. మిల్కా సింగ్, చ‌క్ దే ఇండియా, దంగ‌ల్ లాంటి క్రీడా నేప‌థ్యం ఉన్న సినిమాలు చూసిన‌ప్పుడు మ‌న‌కు తెలియ‌కుండానే అందులో లీన‌మై ఒక ర‌క‌మైన ఉత్తేజాన్ని పొందుతాం. అలాగే క్రీడ‌ల‌ను చూసినా మ‌న‌కు తెలియ‌కుండానే స‌వాళ్ల‌ను స్వీక‌రించే గుణాన్ని అల‌వ‌ర్చుకుంటాం. కాబ‌ట్టి క్రీడ‌లు చూడ‌టం టైం పాస్ విష‌యం అస్స‌లు కానేకాదు. కాబ‌ట్టి సినిమాలు చూడాలి. క్రీడా మ్యాచ్ లు చూడాలి. ప‌ర్య‌ట‌న‌లు చేయాలి. కొత్త ఫంక్ష‌న్ ల‌కు వెళ్లాలి. అక్క‌డ విలువైన జీవిత‌పు పాఠాలు నేర్చుకుని స్ఫూర్తి పొందాలి. అప్పుడే జీవితం మారుతుంది. లైఫ్ జీరో నుంచి సెంచ‌రీ స్కోర్ దిశ‌గా సాగుతుంది.

 

( ఈ ఆర్టిక‌ల్ ను మీకు స్పాన్సర్ చేసిన‌వారు)