Tag: Interview Tips
ఆ విషయంలో నిజాయితీగా ఉంటే మీకు ఉద్యోగం వచ్చినట్టే !!
ఇప్పుడు ఇంటర్వ్యూ అంటే ఒక మహా యుద్ధాన్ని గెలవడం లాంటిది. గెలుపుకి ఓటమికి మధ్య చిన్న అంతరం మాత్రమే ఉంటుంది. బలం ఉన్నా పొరపాట్లు చేసినవాళ్లు యుద్ధంలో ఓడిపోయినట్టు ఎన్ని నైపుణ్యాలు ఉన్నా చిన్న చిన్న తప్పులు మీకు ఉద్యోగం రాకుండా అడ్డుపడతాయి. ముఖ్యంగా క్లాస్ రూమ్ సబ్జెక్ట్ లో నెంబర్‌వన్ గా ఉన్న వాళ్లు ఇంటర్వ్యూలో ఫెయిల్ కావడం మనం చూస్తూనే ఉంటాం. ఎందుకు ఇలా జరుగుతుంది? ఇంటర్వ్యూకు, గదిలో కూర్చుని పరీక్ష రాయడానికి మధ్య చాలా తేడా ఉంది. ఇంటర్వ్యూ అంటే రెండు గంటల్లో మీ నైపుణ్యాలతో పాటు మీ వ్యక్తిత్వాన్ని అంచనా వేసే ఒక ప్రక్రియ. ఇక్కడ నైపుణ్యం మాత్రమే ఉంటే సరిపోదు. నిజాయితీ, వాస్తవికంగా ఆలోచించే లక్షణం ఉన్నవాళ్లే విజేతలుగా నిలుస్తారు. ఉన్నది ఉన్నట్టు.. తెలిసింది తెలిసినట్టు చెప్పడమే మీకు విజయాన్ని తెచ్చిపెడుతుంది. ముఖ్యంగా హాబీలు, జామ్ ( జస్ట్ ఏ మినిట్ ) రౌండ్ లో నిజాయితీ అనేది అభ్యర్ధులకు బాగా ఉపయోగపడుతుంది.
తప్పులో కాలేయకండి!
చాలా మంది అభ్యర్ధులు హాబీల విషయంలో రెజ్యుమెలో పేర్కొన్న దానికి వాస్తవంగా వాళ్లు ఇష్టపడే దానికి ఎక్కడా పొంతన ఉండదు. ఇటువంటి సందర్భాల్లో ఇంటర్వ్వూలో విఫలం అయ్యే అవకాశాలున్నాయి. ఉదాహరణకు మీరు రెజ్యుమెలో హాబీల దగ్గర బుక్ రీడింగ్ అని రాసారు అనుకోండి. అక్కడ చాలా పర్టిక్యులర్ గా మీరు ఎటువంటి పుస్తకాలు చదువుతారో తప్పనిసరిగా వివరించాలి. బుక్ రీడింగ్ అని చెప్పినప్పుడు రిక్రూటర్ల నుంచి మీకు విభిన్న ప్రశ్నలు ఎదురు కావచ్చు. ప్రముఖ వ్యక్తులు బయోగ్రఫీలు చదివారా? అని అడగొచ్చు. అప్పుడు తెల్లమొఖం వేసే పరిస్థితి ఎదురుకావచ్చు. అందుకే చాలా క్లియర్ గా నేను ఫిక్షన్ పుస్తకాలు మాత్రమే చదువుతాను అని వెల్లడించాలి. అది కూడా మీకు నిజంగా పుస్తకం పఠనం అంటే ఆసక్తి ఉండి మీరు నిజంగా ఫిక్షన్ పుస్తకాలు చదువుతున్నప్పుడు మాత్రమే అలా రాయాలి. లేని విషయాన్ని చెప్పడం వలన రిక్రూటర్స్ అడిగే ప్రశ్నలకు మీ దగ్గర సమాధానాలు ఉండవు. ఎవరో రాసారని కాకుండా నిజంగా మీకు ఆసక్తి అంశాన్నే హాబీలుగా పేర్కొనాలి.
అబద్దాలు చెపితే అడ్డంగా బుక్కవుతారు!
మనం ముందు చెప్పుకున్నట్టు హాబీల విషయంలో అస్సలు అబద్దాలు చెప్పకూడదు. ఒక విషయంపై సరైన అవగాహన లేనప్పుడే అది నా హాబీ అని చెప్పడం అంటే మీకు మీరు నష్టం చేసుకుంటున్నట్టే. ఉదాహరణకు సినిమాలు చూడటం నా హాబీ అని చెప్పారనుకొండి. సినిమాకు సంబంధించి అన్ని విషయాలపైన కనీసం ప్రాథమిక అంశాల మీద కాస్త అయినా పట్టు ఉండాలి. ఫలానా దర్శకుడు తీసిన హిట్ సినిమాలు ఏవి అన్న ప్రశ్న ఎదురు కావచ్చు. లేదా ఫలానా నటుడి గురించి వివరాలు అడగొచ్చు. అప్పుడు నీళ్లు నమిలితే ఉపయోగం ఉండదు. మీరు అబద్దం చెప్పారన్న విషయం రిక్రూటర్స్ కు చాలా క్లియర్ గా అర్ధం అవుతుంది. హాబీ అనేది మీ ఇష్టంలోని గాఢతను తెలియజేయాలి. అది సినిమా కావచ్చు, పోటగ్రఫీ కావచ్చు, క్రికెట్ కావచ్చు మరేదైనా కావచ్చు. అందులోని ప్రాథమిక విషయాలపై ఏం అడిగినా చెప్పే విధంగా ఆ గాఢత ఉండాలి. అంతేకాని నోటికి వచ్చింది చెపితే మీరు ఇంటర్వ్యూలో విజేతలు కాలేరు.
‘జస్ట్ ఏ మినిట్’ లో కూడా నిజాయితీయే కీలకం!
ఇప్పుడు ఇంటర్వ్యూలో జామ్ ( జస్ట్ ఏ మినిట్ ) కూడా చాలా కీలకంగా మారింది. ఒక నిమిషం టైం ఇచ్చి ఒక అంశం ఇచ్చి మాట్లాడమని చెపుతారు. చాలా వరకూ ఇంటర్వ్యూల్లో జామ్ లో మీ రోల్ మోడల్ గురించి చెప్పండి అని అడుగుతారు. మీకు ఎంత మంచి కమ్యూనికేషన్ ఉన్నా ఎంత పద సంపద ఉన్నా మీరు చెప్పినదాంట్లో వాస్తవికత కనిపించకపోతే రిక్రూటర్స్ నిర్దాక్షిణ్యంగా మిమ్మల్ని రిజెక్ట్ చేస్తారు. జామ్ లో చాలా మంది అభ్యర్ధులు రోల్ మోడల్ గురించి చెప్పమనగానే తమ కమ్యూనికేషన్ ను ఉపయోగించి ఒక ప్రముఖ వ్యక్తి గురించి గడాగడా చెప్పేస్తారు. అది పూర్తి తప్పు. రోల్ మోడల్ గురించి చెప్పమన్నప్పుడు ఆ వ్యక్తి మీకు ఏ విధంగా స్ఫూర్తిగా నిలిచాడో అతని నుంచి ఏం నేర్చుకున్నారో మీరు చెప్పగలగాలి. ధైర్యం, ఏదైనా సాధించగలననే నమ్మకం మీకు ఎలా వచ్చిందో చెప్పాలి. అంతేకానీ అతని జీవిత చరిత్రను అప్పజెపితే రిక్రూటర్స్ మీకు ఎందుకు ఉద్యోగం ఇస్తారు? ఎందుకంటే మీ నిజాయితీని పరీక్షించాలనుకుంటున్నవారికి మీరు కృత్రిమ జవాబులు చెపితే ఎలా నచ్చుతుంది?
మీ నిజాయితీకి అడుగడుగునా పరీక్ష ఎదురవుతుంది!
ఇంటర్వ్యూలో ఇదొక్కటే కాదు. మీ నుంచి వాస్తవికతతో కూడిన సమాధానం రాబట్టేందుకు రిక్రూటర్స్ చాలా ప్రయత్నిస్తారు. ముఖ్యంగా అభ్యర్ధుల సమయస్ఫూర్తిని పరీక్షించేందుకు రకరకాల ప్రశ్నలు సంధిస్తారు. అకస్మాత్తుగా వారు వేసే ప్రశ్నలకు తెల్లమొఖం వేసినా గుర్తుకు రావట్లేదు అని చెప్పినా మీరు విఫలమైనట్టే. ఉదాహరణకు మధ్యాహ్నం భోజనం ఏం చేసావు? మీ నాన్న ఈరోజు ఏ కలర్ డ్రెస్ వేసుకున్నారు? అని అడుగుతారు. వాటికి వెంటనే ఉన్నది ఉన్నట్టు టక్కున సమాధానం చెప్పాలి. మీ ఐక్యూని, ఒక విషయంపై మీ నిజాయితీని అంచనా వేసేందుకు ఇలాంటి ప్రశ్నలు అడుగుతారు. కాబట్టి అయోమయానికి గురికాకుండా సమయస్పూర్తిగా సమాధానాలు చెప్పాలి. వాస్తవికతతో నిజాయితీగా ఉంటే ఇంటర్వ్యూలో మీ విజయాన్ని ఆపడం ఎవరి తరమూ కాదు.
(ఈ ఆర్టికల్ ను మీకు స్పాన్సర్ చేస్తున్నవారు)
ఇంటర్వ్యూకు వెళ్లే ముందు వీటిని సరిచూసుకోండి!
ప్రస్తుతం జాబ్ మార్కెట్లో ఉద్యోగం సంపాదించడం అంటే ఆషామాషీ విషయమేమీ కాదు. నైపుణ్యతకు, నాయకత్వ లక్షణాలకు పెద్ద పీట వేస్తున్న కంపెనీలు నాణ్యమైన అభ్యర్ధులను మాత్రమే ఉద్యోగాల్లోకి తీసుకుంటున్నాయి. ఈ పరిణామం ఇప్పుడు అభ్యర్ధుల్లో భయాన్ని కలిగిస్తోంది. ఇంటర్వ్యూకు వెళ్లినా ఉద్యోగం వస్తుందా రాదా అన్న ఆందోళన చాలా మందికి ఒత్తిడిని కలిగిస్తోంది. అయితే ఆ ఒత్తిడిని అధిగమించి ధైర్యంగా తన నైపుణ్యాలను ప్రదర్శించే వారే ఇంటర్వ్యూలో విజయం సాధించి ఉద్యోగాన్ని సాధించగలుగుతారు. ఇంటర్వ్యూను విజేతలు కావాలంటే కొన్ని ముఖ్యమైన అంశాలపై పూర్తిగా పట్టు సాధించాలని హెచ్ఆర్ నిపుణులు చెపుతున్నారు. లేటేస్ట్ ట్రెండ్ కు అనుగుణంగా వీటిని పదును పెట్టుకుంటే కచ్చితంగా జాబ్ సాధించేందుకు అవకాశాలు మెరుగవుతాయి.
సంపూర్ణ అవగాహన చాలా అవసరం!
ఒక కంపెనీకి ఇంటర్వ్యూకు వెళుతున్నప్పుడు అభ్యర్ధులు సమగ్ర ప్రణాళికను సిద్ధం చేసుకోవాలి. ముందుగా ఏదైతే కంపెనీకి ఇంటర్వ్యూకు వెళ్తున్నారో ఆ కంపెనీపై పూర్తి అవగాహన తెచ్చుకోవాలి. ఆ కంపెనీకి సంబంధించిన వెబ్‌సైట్ లోకి వెళ్లి ఆ కంపెనీ నిర్వహిస్తున్న కార్యకలాపాలు, వాళ్ల లక్ష్యాలు ఇలా అన్ని విషయాలపై ఒక నాలెడ్జ్ ను సంపాదించాలి. ఇంటర్వ్యూకు వెళ్లిన కంపెనీ గూర్చి మీకు ఏం తెలుసున్నదే అక్కడ కీలకంగా మారుతుంది. ముఖ్యంగా ఈ కంపెనీలో నిర్దేశించిన విధులకు తాను ఏ విధంగా న్యాయం చేయగలను అన్న విషయాన్ని అభ్యర్ధి సావధానంగా చెప్పాల్సి ఉంటుంది. దీని వలన కంపెనీ తన నుంచి ఏ ఆశిస్తుందో అన్న విషయంపై పూర్తి సాధికారత వస్తుంది. ఇలా ఇంటర్వ్యూకు వెళ్లిన కంపెనీ పూర్తి సమాచారం , అవగాహన మీ దగ్గర ఉన్నప్పుడు మీరు జాబ్ విషయంలో ఎంత సీరియస్ గా ఉన్నారన్న విషయం ఇంటర్వ్యూ చేసేవాళ్లకి అర్ధమవుతుంది.
కంపెనీకి అనుగుణంగా సీవీ!
చాలా మంది అభ్యర్ధులు ఒక సీవీ ని రెడీ చేసుకు పెట్టుకుని దాన్నే ప్రతీ ఇంటర్వ్యూకు తీసుకెళ్తారు. ఇది సరైన పద్ధతి కాదు. మనం ఇంటర్వ్యూకు వెళుతున్న కంపెనీ, అక్కడి పొజిషన్ ఆధారంగా సీవీని ప్రత్యేకంగా తయారు చేసుకోవాలి. చూడగానే సీవీ ఆకట్టుకునేలా ఉండాలి. సంక్షిప్తంగా సింపుల్ ఇంగ్లీష్ లో సీవీ ఉండాలి. అనవసర ఆడంబరాలు, డాంబికాలు లేకుండా సీవీని చాలా శ్రద్ధగా తయారు చేసుకోవాలి. అప్పటివరకూ సాధించిన అచీవ్‌మెంట్స్ ను చిన్న చిన్న వాక్యాలతో రాసుకుంటే చూసిన వారిని ఈజీగా అర్ధమవుతుంది. అలాగే వ్యక్తిగత విషయాలు, ఇతర అంశాలను బుల్లెట్ పాయింట్స్ తో రాసుకుంటే ఫలితం ఉంటుంది. అలాగా సీవీలో అబద్ధాలకు, అతిశయోక్తులకు చోటు లేకుండా చూసుకోవాలి.
కమ్యూనికేషన్ మెరుగుపర్చుకోవాలి!
అసలు ఇంటర్వ్యూ అంటే ఏమిటి? ఒక అభ్యర్ధిలోని సత్తాను, సామర్ధ్యాన్ని గుర్తించే ప్రక్రియ. ఇంటర్వ్యూలో అడిగే ప్రశ్నలకు ఒక వ్యూహం ప్రకారం బెరుకు లేకుండా సమగ్రంగా సమాధానాలు చెప్పాలి. అలా చెప్పాలి అంటే అభ్యర్ధులు కమ్యూనికేషన్ వ్యూహం ఒక పద్ధతి ప్రకారం ఉండాలి. ఇంటర్వ్యూ చేసే వాళ్లు ఏమి అడుగుతున్నారు. అన్న దాన్ని చూసుకుని ప్రశ్నకు తగ్గ సమాధానాన్ని చాలా క్లుప్తంగా చెప్పాల్సి ఉంటుంది. అలాగే చెపుతున్న సమాధానాన్ని ఎలా ఎక్స్‌ప్రెస్ చేస్తున్నాం అన్నది కూడా చాలా ముఖ్యం. కమ్యూనికేషన్ అంశాలపై పట్టు ఉన్న వారికి జాబ్ రావడం పెద్ద కష్టమైన విషయమేమీ కాదు.
సోషల్ మీడియా, జాబ్ పోర్టల్స్ పరిశీలన!
ప్రస్తుతం జాబ్ మార్కెట్లో కూడా సోషల్ మీడియా కీలక పాత్ర పోషిస్తోంది. అభ్యర్ధుల ప్రొఫైల్ ను చూసే ఉద్యోగాన్ని ఇచ్చే కంపెనీలు పెరుగుతున్నాయి. ఇటువంటి పరిస్థితుల్లో సోషల్ మీడియా ప్రొఫైల్ ను ప్రొఫెషనల్ గా తయారు చేసుకోవడంపై అభ్యర్ధులు దృష్టిపెట్టాలి. ఎటువంటి వివాదాలు, లోపాలు లేకుండా సోషల్ మీడియా ప్రొఫైల్, వ్యక్తిగత పేజ్ క్లీన్ గా ఉండేలా చూసుకోవాలి. తనకు సంబంధించిన రంగంపై చేస్తున్న పోస్ట్ లు, అభిప్రాయాలను కంపెనీలు పరిగణనలోకి తీసుకుంటాయి. కాబట్టి మంచి కంపెనీలో మంచి జాబ్ కావాలంటే సోషల్ మీడియా ప్రొఫైల్ పై కూడా దృష్టి పెట్టాలి.
ఇంప్రెషన్, ఫాలోఅప్ కూడా కీలకం!
ఇంటర్వ్యూలో గెలుపు సాధించామా లేదా అన్న విషయాన్ని పక్కన పెడితే ఇంటర్వ్యూ చేసేవాళ్లకు అభ్యర్ధులు మంచి ఇంప్రెషన్ ను కలిగించాలి. చెప్పిన సమయానికి ఇంటర్వ్యూకు రావడం, మంచి డ్రెస్సింగ్, కాన్ఫిడెన్స్, ఐ కాంటాక్ట్, చెప్పే విషయంలో క్లారిటీ, గతంలో సాధించిన అచీవ్‌మెంట్స్ పై ఆచితూచి మాట్లాడటం వంటివి అభ్యర్ధులపై మంచి ఇంప్రెషన్ ను కలిగిస్తాయి. ఇంటర్వ్యూలో చేసే వాళ్లకు మంచి ఇంప్రెషన్ కలిగించారంటే ఉద్యోగం వచ్చినట్టే. కంపెనీ మీ నుంచి ఏం ఆశిస్తుందో సూచన ప్రాయంగా తెలియజేస్తుంది. దాన్ని అర్ధం చేసుకుని తుది ఎంపికకు సంబంధించిన సమాచారాన్ని జాగ్రత్తగా అడిగి తెలుసుకోవాలి. అలాగే ఫాలోఅప్ ను మిస్ కాకుండా చూసుకోవాలి. ఆ కంపెనీలో అవకాశం ఉందా అని అడగటం ద్వారా మిమ్మల్ని ఉద్యోగంలోకి తీసుకుంటే కంపెనీకి అదనపు లాభం చేకూరుతుందని వాళ్లకు అర్ధమయ్యేలా చెప్పగలగాలి.
(ఈ ఆర్టికల్ ను మీకు స్పాన్సర్ చేస్తున్నవారు)
‘ఎక్స్‌ట్రా’ లు చేస్తున్నారా? అయితే మీకు జాబ్ వచ్చినట్టే..!!
ప్రస్తుతం హెచ్ఆర్ నిపుణులు చెప్పే మాట ఒకటే. జాబ్ మార్కెట్లో ట్రెండ్ మారిపోయింది. కంపెనీల ఆలోచనా తీరులో మార్పులు వస్తున్నాయి. ముఖ్యంగా ఫ్రెషర్స్ ను ఉద్యోగంలోకి తీసుకోవడంలో కంపెనీలు గతంలోలా వ్యవహరించడం లేదు. విభిన్న విషయాలను, అంశాలను బేరీజు వేసుకుని దీర్ఘకాలిక లక్ష్యాలను దృష్టిలో పెట్టుకుని అభ్యర్ధులను ఎంపిక చేసుకుంటున్నాయి. ప్రజంట్ ఇంటర్వ్యూలలో కేవలం అకడమిక్ రికార్డును మార్కులను చూసి ఉద్యోగాలు ఇవ్వడం లేదు. మార్కులు కాస్త తక్కువ ఉన్నా అభ్యర్ధిలో ఎక్స్‌ట్రా కరిక్యులర్ యాక్టివిటీస్ కు ఎక్కువగా ప్రాధాన్యం ఇస్తున్నారు. ఎందుకంటే ఇప్పుడు కంపెనీలు కావాల్సింది ఆల్‌రౌండర్లు. పనిచేస్తూనే అన్ని విషయాలను సమన్వయం చేసుకుంటూ అందరితో కలుపుగోలుగా వ్యవహరిస్తూ మెసిలే సిసలైన నాయకులు కావాలి. కాబట్టి ఇప్పుడు బాగా మార్కులు తెచ్చుకుంటే ఉద్యోగం వచ్చేస్తుంది అన్న ఆలోచనను విద్యార్ధులు తొలిగించుకోవాలి. చదువుతో పాటు ఆటల్లో, ఈవెంట్ మేనేజ్‌మెంట్ లలో చురుగ్గా ఉండాలి.
కంపెనీలు ఎందుకు ఈ ఎక్స్‌ట్రా లను కోరుకుంటున్నాయి?
మన దేశంలో చదువు అంటే కేవలం మార్కులే కానీ విదేశాల్లో అయితే చదువుకు ఎంత ప్రాధాన్యతనిస్తారో ఎక్స్‌ట్రా కరిక్యులర్ యాక్టివిటీస్ కు కూడా అంతే ప్రాధాన్యతనిస్తారు. ఎందుకంటే వాస్తవానికి అవే విద్యార్ధి దశలో చాలా చాలా ముఖ్యమైనవి. ఎందుకంటే ఒక విద్యార్ధిలోని నిజమైన నాయకుడ్ని, సమస్యలను పరిష్కరించే వ్యక్తిని ఆవిష్కరించేవి ఎక్స్‌ట్రా కరిక్యులర్ యాక్టివీటీస్ మాత్రమే. అందుకే కంపెనీలు ఈ లక్షణాలు ఉన్న అభ్యర్ధుల కోసం ఎదురుచూస్తున్నాయి. ఎందుకంటే సంస్థలో విధులు నిర్వర్తించే క్రమంలో ఏమైనా సమస్యలు ఎదురైతే అభ్యర్ధులు చాలా వేగంగా స్పందిస్తారని కంపెనీలు నమ్ముతున్నాయి. అందుకే రెజ్యుమెలో కాలేజీలో ఈవెంట్లు నిర్వహణ, ఇతర అదనపు అర్హతలు వంటి వాటికి పెద్దపీట వేస్తున్నాయి. కంపెనీల ఆలోచనా విధానంలో వచ్చిన ఈ మార్పులను దృష్టిలో పెట్టుకుని విద్యార్ధులు ఎక్స్‌ట్రా కరిక్యులర్ యాక్టివిటీస్ పై శ్రద్ధ పెట్టాలని హెచ్ఆర్ నిపుణులు సూచిస్తున్నారు.
ఎక్స్‌ట్రా కరిక్యులర్ యాక్టివిటీస్ ఎన్నో..!
ప్రస్తుతం ఎక్స్‌ట్రా కరిక్యులర్ యాక్టివీటీస్ పై కళాశాలల్లో కాస్త అవగాహన పెరిగింది. ఇప్పుడు కావాల్సిందల్లా విద్యార్ధులు తగిన చొరవ తీసుకోవడమే. కళాశాలల్లో ఈవెంట్స్ ను కండక్ట్ చేయడం, అదే విధంగా కల్చరల్ ఫెస్టివల్స్ లో పార్టిసిపేట్ చేయడం, అదే విధంగా ఇన్‌స్టిట్యూట్ లో నిర్వహించే అన్ని రకాల కార్యక్రమాలను నడిపించే ఆర్గనైజింగ్ బాధ్యతలు తీసుకోవడం వంటి వాటి వలన టీమ్ ను ఎలా నడపాలో, గడువు లోగా పనులు ఎలా నిర్వహించాలో తెలుస్తుంది. ప్రస్తుతం చాలా ఇన్‌స్టిట్యూట్ లో కల్చరల్ సొసైటీ కాన్సెప్ట్ నడుస్తోంది. అకడమిక్స్ లో విద్యార్ధులు పడే ఒత్తిడిని తగ్గించేందుకు ఈ పద్ధతిని అవలంభిస్తున్నారు. ఈ అవకాశాన్ని విద్యార్ధులు ఉపయోగించుకోవాలి. అలాగే ప్రతిష్టాత్మక సంస్థలైన సీఐఐ, నాస్కామ్, ఫిక్కీ, అసోచామ్ లలో స్టూడెంట్ మెంబర్‌షిప్ తీసుకుంటే మరింత ఉపయోగకరంగా ఉంటుంది. ఆయా సంస్థలు నిర్వహించే సెమినార్లలో పాల్గొనడం ద్వారా నిపుణులను, ఉన్నత వ్యక్తులను కలుసుకుని వారి నుంచి సలహాలు పొందడంతో పాటు స్పూర్తిని కూడా పొందే వీలుంటుంది. అలాగే వాలంటీర్ సర్వీస్ లు కూడా చేస్తే సమాజంలో ఏం జరుగుతోంది. ప్రజలు ఏ ఇబ్బందులు పడుతున్నారు అన్న దానిపై అవగాహన పెరుగుతుంది. వీటన్నింటిని రెజ్యుమెలో పొందుపర్చుకుంటే అవే ఇప్పుడు ప్రధాన అర్హతలుగా మారుతున్నాయి.
ఎక్స్‌ట్రా కరిక్యులర్ యాక్టివిటీస్ తో ఎన్నో లాభాలు!
ఎక్స్‌ట్రా కరిక్యులర్ యాక్టివీటీస్ పై చాలా మంది తల్లిదండ్రులకు కూడా సదభిప్రాయం లేదు. వీటి వలన పిల్లల చదువు పాడవుతుందని చాలా మంది పేరెంట్స్ భావిస్తున్నారు. అయితే ఆ అభిప్రాయం పూర్తి తప్పు. వీటిల్లో పార్టిసిపేట్ చేయడం వలన విభిన్న వ్యక్తులతో కలివిడిగా మాట్లాడటం అలవడి బెరుకు అన్నది పోతుంది. అలాగే నలుగురితో మాట్లాడటం వలన సమస్యను పరిష్కరించే విధానం, మనుష్యులతో ఎలా మాట్లాడాలో తెలుస్తుంది. ఓవరాల్ గా కమ్యూనికేషన్ స్కిల్స్ లో మంచి దిట్టలుగా నిలబడగలుగుతారు. అదే విధంగా ఒక కార్యక్రమంలో ఎంతో మందిని సమన్వయం చేయాల్సి రావడంతో మంచి లీడర్‌షిప్ లక్షణాలు కూడా పెరుగుతాయి. పెద్ద పెద్ద సెమినార్స్ లో షెడ్యూల్స్ ను ఖరారు చేయడం, ప్రతినిధులకు తెలియజేయడం వంటి వాటి వలన సమన్వయ సామర్ధ్యం పెరుగుతుంది. ఇవన్నీ రెజ్యుమెలో ఉంటే కంపెనీలు ఉద్యోగంలోకి తీసుకోకుండా ఉండలేవు.
విద్యార్ధులకు ఎన్నో ఉపయోగాలు!
ఎక్స్‌ట్రా కరిక్యులర్ యాక్టివిటీస్ వలన విద్యార్ధులకు వ్యక్తిగతంగా ఎన్నో ప్రయోజనాలున్నాయి. కాలేజీలో వీటిల్లో చురుగా పాల్గొనడం వలన ఆత్మవిశ్వాసం పెరగడంతో పాటు ఒత్తిడిని ఎదుర్కొనే నేర్పు, భవిష్యత్ పై సానుకూల దృక్ఫధం, సమాజం పట్ల అవగాహన పెరుగుతాయి. ఇక రెజ్యుమెలో ఈ వివరాలను పొందుపర్చడం వలన రిక్రూటర్లు సానుకూలంగా స్పందిస్తున్నారు. ఎందుకంటే ఎక్స్‌ట్రా కరిక్యులర్ యాక్టివిటీస్ లో చురుగ్గా ఉన్న అభ్యర్ధుల్లో నాయకత్వ లక్షణాలు, సమయస్ఫూర్తి, టీమ్ మేనేజ్‌మెంట్, నిరంతరం నేర్చుకునే లక్షణాలు ఉంటాయని వాళ్లు భావిస్తున్నారు. అందుకే మార్కులు ఎక్కువ వచ్చిన అభ్యర్ధుల కంటే ఎక్స్‌ట్రా కరిక్యులర్ యాక్టివిటీస్ బాగా చేస్తున్న అభ్యర్ధులనే ఉద్యోగాల్లోకి తీసుకుంటున్నారు. ఈ విషయాన్ని గుర్తించి విద్యార్ధులు తమ భవిష్యత్ ప్రణాళికలను తగిన విధంగా మార్చుకోవాలి. అన్ని విషయాల్లో చురుగ్గా ఉండాలి. అప్పుడే మీ డ్రీమ్ జాబ్ మీ తలుపు తడుతుంది.
(ఈ ఆర్టికల్ ను మీకు స్పాన్సర్ చేసినవారు)
