‘పిల్ల‌ల పెంప‌కంలో 21 అద్భుత సూత్రాలు’ పుస్త‌కాన్ని ప్ర‌తీ పేరెంట్ చ‌ద‌వాలి – భార‌తీయం స‌త్య‌వాణి

 

 

ఈ టెక్నాల‌జీ యుగంలో అతి క‌ష్ట‌మైన ప‌నుల్లో ఒక‌టి పేరెంటింగ్. పిల్ల‌ల‌ను బాగా పెంచి , మంచి పౌరులుగా, బాధ్య‌త క‌లిగిన వ్య‌క్తులుగా తీర్చిదిద్ద‌డం సవాలుతో కూడుకున్న ప‌ని. త‌ల్లిదండ్రులు ఇద్ద‌రూ ఉద్యోగాలు చేయ‌డం, సాంకేతికత విస్తృతంగా పెరిగిపోవ‌డంతో పిల్లల‌ను అదుపులో పెట్ట‌డం అనేది క‌ష్ట‌సాధ్యంగా మారుతోంది. ఒకవేళ ఆంక్ష‌లు విధించినా, నిఘా పెట్టినా టీనేజీ పిల్ల‌లు మాన‌సిక అప‌రిప‌క్వ‌త‌తో దారుణ నిర్ణ‌యాలు తీసుకుంటున్నారు. చిన్న త‌నం నుంచి విలువ‌ల‌తో కూడిన పెంప‌కం లేక‌పోవ‌డం వ‌ల‌న ఇన్ని స‌మ‌స్య‌లు చెల‌రేగుతున్నాయి. పిల్ల‌వాడు పుట్టిన ద‌గ్గ‌ర్నుంచి అత‌నికి ఎటువంటి విష‌యాలు నేర్పించాలి? పెంప‌కంలో సంస్కృతీ, సంప్ర‌దాయాల ప్రాముఖ్య‌త ఏమిటి? త‌ల్లిదండ్రులు చేస్తున్న పొర‌పాట్లపై ప్ర‌ముఖ విద్యావేత్త డాక్ట‌ర్ ఆర్.బీ. అంకం గారు రాసిన ‘పిల్ల‌ల పెంప‌కంలో 21 అద్భుత సూత్రాలు’ పుస్త‌కం ఇప్పుడు పేరేంటింగ్ కు దిక్సూచిగా మారింది. ఈ పుస్త‌కంలో ఉన్న మంచి విషయాల‌పై ప్ర‌ముఖ సంఘ సేవ‌కురాలు శ్రీమ‌తి స‌త్య‌వాణి గారు వెల్ల‌డించిన అభిప్రాయాల‌ను ఈ వీడియోలో మీరు చూడండి.

 

బాగా కిక్ ఇచ్చే డ్రగ్స్ ఏంటో తెలుసా?

 

 

ఇప్పుడు మ‌న దేశంలో మాద‌క ద్ర‌వ్యాలు అతిపెద్ద స‌మ‌స్య‌గా ప‌రిణ‌మించాయి. మాద‌క ద్ర‌వ్యాల‌కు బానిస‌లుగా మార‌డంతో ఉత్సాహంతో ఉర‌క‌లెత్తాల్సిన యువ‌త, జ‌వ‌స‌త్వాలు ఉడిగి య‌వ్వ‌నంలోనే శారీరకంగా మానసికంగా నిర్వీర్వ‌మైపోతున్నారు. పంజాబ్ లాంటి రాష్ట్రాల్లో అయితే ఏకంగా కుటుంబాల‌కు కుటుంబాలే నాశ‌న‌మై ఆ రాష్ట్ర ఆర్థిక వ్య‌వ‌స్థ కుప్ప‌కూలిపోయే ప‌రిస్థితి ఏర్ప‌డింది. ప్ర‌భుత్వాలు ఎన్ని ఊక‌దంపుడు ఉప‌న్యాసాలు ఇచ్చినా మ‌న దేశంలో ఇప్ప‌టికీ మాద‌క ద్ర‌వ్యాలు సులువుగానే దొరుకుతున్నాయి. ఒకవైపు దేశానికి వెన్నుముక లాంటి యువ‌త మాద‌క‌ద్ర‌వ్యాల సేవ‌నంతో ప‌త‌న‌మ‌వుతుంటే మ‌రోవైపు పాల‌కులు మాత్రం ఇంకా నిషేధం అన్న ద‌గ్గ‌రే నిలిచిపోయారు. అయితే మాదక ద్ర‌వ్యాలపై ఎప్ప‌టి నుంచో నిషేధం ఉన్న‌ప్ప‌టికీ అవి యువ‌త‌కు ఎలా అందుబాటులోకి వ‌స్తున్నాయి? అస‌లు అన్నింటికంటే ముఖ్యంగా కేవ‌లం మాద‌క ద్ర‌వ్యాల‌ను నిషేధిస్తే ఈ పెను స‌మ‌స్య ప‌రిష్కార‌మైపోతుందా? అన్న ప్ర‌శ్న‌లు అతిపెద్ద చ‌ర్చ‌నీయాంశాలు. ఈ నేపథ్యంలో మాద‌క ద్ర‌వ్యాలు, యువ శ‌క్తిపై “కెరీర్ టైమ్స్” ప్ర‌త్యేక విశ్లేష‌ణ‌.

 

 

నిషేధం అన్న ప‌ద‌మే అతిపెద్ద మాద‌క‌ద్ర‌వ్యం!!

 

మ‌నిషి ఆలోచ‌నా విధానం, మాన‌సిక ప‌రిప‌క్వ‌త‌, వికాసం అన్న‌వి అత్యంత సంక్లిష్ఠ‌మైన విష‌యాలు. మానసిక శాస్త్ర‌వేత్త‌ల అధ్య‌య‌నాల ప్ర‌కారం ఫలానా ప‌నిచేయొద్దు..ఫ‌లానా వ‌స్తువును తినొద్దు…ఫ‌లానాది తాకొద్దు, చూడొద్దు..అంటూ నియంత్ర‌ణ‌లు విధిస్తే ఎట్టి ప‌రిస్థితుల్లోనైనా ఆ ప‌ని చేయాల‌ని..వ‌ద్దు అన్న‌దాన్నే తినాల‌ని..తాకొద్దు అన్నదాన్నే తాకాల‌ని..చూడొద్దు అన్న దాన్నే చూడాల‌ని మ‌నిషి మ‌న‌స్సు ఉబ‌లాట‌ప‌డుతుంది. ముఖ్యంగా నియంత్ర‌ణ విధించిన ఆ ప‌నులపై అర‌కొర స‌మాచారం, త‌ప్పుడు స‌మాచారం వాటిపై మ‌రింత ఆక‌ర్ష‌ణ పెరిగేలా చేస్తుంది. దీంతో వాటిని ఎలాగైనా తినాల‌ని, వాటిని సాధించి అందులోని మ‌జాను ఆస్వాదించాల‌ని మ‌న‌స్సు ఉవ్విళ్లూరుతుంది. మాద‌క ద్ర‌వ్యాల విష‌యంలో ఇప్పుడు స‌రిగ్గా ఇలానే జ‌రుగుతోంది. వాటికి నిషేధం అన్న ముసుగు వేయడంతో ఆ ముసుగు వెన‌కాల అద్బుత‌మైన ఆనందం దాగి ఉంద‌ని యువ‌త‌ను పెడ‌దారి ప‌ట్టించే అరాచ‌క శ‌క్తులు ఎక్కువైపోయాయి. దీంతో యువ‌త డ్ర‌గ్స్ ఏదో అద్భుతం దాగి ఉంద‌న్న ఆక‌ర్ష‌ణ‌తో జీవితాల‌ను స‌ర్వ నాశ‌నం చేసుకుంటున్నారు.

 

 

మ‌న రోజువారీ జీవితంలోనూ మాద‌క ద్ర‌వ్యాలు ఉన్నాయి!

 

మ‌న రోజూవారీ జీవితంలో మాద‌క ద్ర‌వ్యాలు ఉండ‌ట‌మేంటి అని ఆశ్చ‌ర్య‌పోతున్నారా? అవును మీరు చ‌దివింది నిజ‌మే. అస‌లు మాద‌క ద్ర‌వ్యం అంటే ఏమిటి? ఒక ప్ర‌త్యేక‌మైన రసాయ‌నాన్ని శ‌రీరంలోకి ఎక్కించుకుని అది అందించే మ‌త్తులోకి జారిపోవ‌డ‌మే క‌దా? మాద‌క ద్రవ్యాలు అంటే కొకైన్, హెరాయిన్, గంజాయి వంటివే కాదు ఆరోగ్య సంర‌క్ష‌ణ‌లో వాడే కొన్ని ర‌కాల మందులు కూడా మాద‌క ద్ర‌వ్యాలు కింద‌కే వ‌స్తాయి. ఉదాహ‌ర‌ణ‌కు షుగ‌ర్ పెషెంట్ల‌కు వాడే కొన్ని ర‌కాల ముందులను డ్ర‌గ్స్ గానే ప‌రిగ‌ణించాలి. అంటే ఆరోగ్యానికి చేటు చేస్తాయ‌ని కాదు. మ‌నిషి ఆ ముందులు వేసుకోవ‌డానికి అల‌వాటు ప‌డి స‌హ‌జ సిద్ధంగా శారీర‌క వ్యాయామం చేసి మంచి స‌మ‌తుల ఆహారం తీసుకుని జీవ‌నశైలిని మార్చుకుని షుగ‌ర్ ను అదుపులోకి తెచ్చుకుందాం అన్న ఆలోచ‌న మ‌ర్చిపోతున్నాడు. కేవ‌లం ఆ డ్ర‌గ్స్ ను శ‌రీరంలో వేసుకుని వాటికి అల‌వాటు ప‌డి అందులోనే జోగుతున్నాడు. అలాగే ప్ర‌స్తుతం మ‌నిషి జీవితాల‌ను తీవ్రంగా ప్ర‌భావితం చేస్తున్న స్మార్ట్ ఫోన్, సోష‌ల్ మీడియా వంటి వాటిని కూడా మాద‌క ద్ర‌వ్యాలు గానే ప‌రిగ‌ణించాలి. అవి లేకుంటే ఒక్క‌క్ష‌ణం కూడా మ‌నుగ‌డ సాగించలేని మ‌న బ‌ల‌హీత‌నను డ్ర‌గ్స్ సేవ‌నంతో స‌మాన‌మైన వ్య‌స‌నంగానే చూడాల్సి ఉంటుంది.

 

 

నిషేధంతో మాద‌క ద్ర‌వ్యాల క‌ట్ట‌డి సాధ్యం కాదు!

 

నిషేధం విధిస్తేనో లేక నియంత్రిస్తేనో మాదక ద్ర‌వ్యాల స‌మ‌స్య అంతం కాదు. ఎందుకంటే వాటిని దొంగ దారిలో యువ‌త‌కు చేర‌వేసే ఆరాచ‌క శ‌క్తులు లెక్క‌కు మించి ఉన్నాయి. నిషేధం అనేది ఎప్ప‌టికీ స‌త్ఫ‌లితాల‌ను ఇవ్వ‌దు. ఇప్పుడు ప్ర‌భుత్వాలు చేయవ‌ల‌సిన ప‌ని నిషేధంతో పాటు స‌మ‌స్య మూలాల్లోకి వెళ్లి దాన్ని తొలిగించే ప్ర‌య‌త్నం చేయ‌డం. పాఠ‌శాల స్థాయి నుంచే పిల్ల‌ల‌కు ధ్యానం, యోగా, కుటుంబ విలువ‌లు, శారీర‌క, మానసిక ఆరోగ్యాల ప్రాధాన్య‌త‌ను వివ‌రిస్తే అద్భుత‌మైన ఫ‌లితాలు వ‌స్తాయి. ధ్యానం చేయడం ద్వారా ల‌భించే అలౌలిక ఆనందం ముందు డ్ర‌గ్స్ అందించే మ‌త్తు బ‌లాదూర్. దీంతో క్ర‌మ‌శిక్ష‌ణ‌, స్వీయ నియంత్ర‌ణ వంటి విష‌యాల్లో పిల్ల‌ల‌ను సుక్షితులుగా త‌యారు చేయాలి. ఇటు త‌ల్లిదండ్రులు కూడా డ‌బ్బు సంపాద‌నే ల‌క్ష్యంగా కాకుండా త‌మ పిల్ల‌ల‌కు త‌గిన స‌మ‌యం కేటాయించి వారి పెంప‌కంలో త‌గు జాగ్ర‌త్త‌లు తీసుకోవాలి. వారి అల‌వాట్లు, ప్ర‌వ‌ర్త‌న పై త‌గు నిఘా ఉంచి అదే స‌మ‌యంలో వారికి ధ్యానం, మ‌న‌స్సుని నియంత్రించే విష‌యాల‌ను ఎప్ప‌టిక‌ప్పుడు చెపుతూ ఉండాలి. తాత్కాలిక ఆనందాలు, సుఖాలు త‌ర్వాత జీవితాన్ని ఎంత‌గా ప్ర‌భావితం చేస్తాయో, ఎటువంటి ప‌త‌నావ‌స్థ‌కి చేరుస్తాయో వారికి స‌రైన ప‌ద్ధ‌తిలో వివ‌రించాలి. ముఖ్యంగా విలువ‌ల‌తో కూడిన పెంప‌కాన్ని అందించాలి.

 

 

న‌మ్మ‌కంలోని మజాతో జీవితానికి కొత్త చిగురులు!

 

ఒక రోగి తీవ్ర‌మైన శారీర‌క రుగ్మ‌త‌తో డాక్ట‌ర్ ద‌గ్గ‌ర‌కు వెళ్లాడు. అత‌న్ని క్షుణ్ణంగా ప‌రీక్షించిన డాక్ట‌ర్ ఇంకో మూడు నెల‌లు మించి మీరు బ‌త‌కడం సాధ్యం కాద‌ని రోగికి స్ప‌ష్టం చేసారు. దీంతో ఆ రోగి మాన‌సికంగా మ‌రింత‌గా దిగ‌జారిపోయాడు. అత‌ను ఎంత‌గా దిగ‌జారిపోయాడంటే క‌నీసం డాక్ట‌ర్ చెప్పిన మూడు నెల‌లైనా బ‌తుకుతాడా? అన్న సందేహం అంద‌రికీ క‌లిగింది. ఇటువంటి ప‌రిస్థితుల్లో ఆ రోగిని ప‌రామ‌ర్శించేందుకు అత‌ని స్నేహితుడు హాస్పిట‌ల్ కు వెళ్లాడు. వృత్తిరీత్యా సైకాల‌జిస్ట్ అయిన రోగి స్నేహితుడు అత‌ని ప‌రిస్థితిని గ‌మ‌నించాడు. అత‌నికి శారీర‌క స‌మ‌స్య కంటే మానసిక స‌మ‌స్య అధికంగా ఉన్న‌ట్టు గుర్తించాడు. త‌న స్నేహితుడ్ని హాస్ప‌ట‌ల్ నుంచి ప్ర‌కృతికి ప్ర‌శాంత‌త‌కు ద‌గ్గ‌ర‌గా ఉండే ఒక ఇంట్లోకి మార్పించాడు. అత‌ని మంచం ప‌క్క‌నే కిటికీ ఉండేట‌ట్టు చూసి అక్క‌డ ఒక మొక్క‌ను నాటాడు. అప్పుడు ఆ రోగితో ఇలా చెప్పాడు. “ఇప్పుడు ఇక్క‌డ ఒక మొక్క‌ను నాటాను. ఈ మొక్క ఆరోగ్యంగా ఎదిగితే నువ్వు కూడా నీ జ‌బ్బు నుంచి బ‌య‌ట‌ప‌డ్డ‌ట్టే. ఒకవేళ మొక్క చ‌నిపోతే నువ్వు కూడా తొంద‌ర‌గా చ‌నిపోతావ్” అని చెప్పాడు. ఆ రోగి ప్ర‌తిరోజూ ఉద‌యం లేవ‌గానే ఆ మొక్క వంక ఆశ‌గా చూసేవాడు. ఆ మొక్క మెల్ల‌గా ఆకులు, పూలు కాస్తూ ఏపుగా పెరుగుతోంది. రోగిలో ఆనందం పెరిగింది. త‌న మొక్క ఎంత బాగా పెరుగుతుంది అన్న ఆనందంలో అత‌ను త‌న జ‌బ్బు సంగ‌తే మ‌ర్చిపోయాడు. ఆరోగ్యంగా పెరిగిన ఆ మొక్క‌లానే అత‌ను కూడా ఆరోగ్యంగా త‌యార‌య్యాడు. వాస్త‌వానికి మొద‌ట నాటిన మొక్క తొలిరోజే చ‌చ్చిపోయింది. కానీ రోగికి తెలియ‌కుండా అతని ఒక కొత్త మొక్క‌ను నాటి దానికి త‌గిన నీరు, ఎరువులు వేసి అది బాగా ఎదిగేలా చూసుకున్నాడు. మొక్క బాగా పెరుగుతుంద‌న్న సంతోషంలో రోగి కూడా ఆరోగ్యంగా త‌యార‌య్యాడు. ఈ క‌థ‌లో నీతి ఏంటి మ‌నలోని న‌మ్మ‌కం, ఆనంద‌మే మ‌న స్థితిని నిర్ణ‌యిస్తాయి. అయితే ఆ ఆనందాన్నిఏ విధంగా సంపాదించుకుంటామ‌న్న‌దే ముఖ్యం. మాద‌క ద్ర‌వ్యాలు తీసుకుని, తాత్కాలిక ఆనందాల కోసం వెంప‌ర్లాడితే ఆనందం, ఆరోగ్యం రెండూ దూర‌మ‌వుతాయి.

 

 

మాద‌క ద్ర‌వ్యాల కంటే కిక్ నిచ్చే సాధ‌నాలున్నాయి!!

 

మాద‌క ద్ర‌వ్యాలు, మ‌ద్య‌పానం కిక్ నిస్తున్నాయి కాబ‌ట్టి వాటిని సేవిస్తున్నారు. ఆ కిక్ కోస‌మే ఆరోగ్యం పాడుచేసుకునేందుకు కూడా రెడీ అవుతున్నారు. కొంద‌రు వాదిస్తారు. కానీ వాస్త‌వానికి వాటి కంటే కిక్ నిచ్చే విష‌యాలు ఎన్నో ఉన్నాయి. ఒక గంట‌సేపు క‌ద‌ల‌కుండా ఒకచోట కూర్చుని , ఒక విష‌యంపై శ్ర‌ద్ధ పెట్టి త‌దేకంగా ధ్యానం చేస్తే వ‌చ్చే కిక్ ఎన్ని మాద‌క ద్ర‌వ్యాలు తీసుకున్నా రాదు. అలాగే ఒక మంచి ప‌ని చేసిన‌ప్పుడు, సాటి మ‌నిషికి ఉపకారం చేసిన‌ప్పుడు, ఆక‌లితో అల‌మ‌టిస్తున్న పేద‌వాళ్ల‌కు క‌డుపునిండా అన్నం పెట్టిన‌ప్పుడు వ‌చ్చే కిక్ ఎంతో బాగుంటుంది. ఇటువంటి విష‌యాల‌ను ప్ర‌తీ విద్యార్ధికి అటు త‌ల్లిదండ్రులు ఇటు ఉపాధ్యాయులు చిన్న‌త‌నం నుంచి చెప్ప‌గ‌ల‌గాలి. ఇక ప్ర‌భుత్వాలు కూడా మాద‌క ద్ర‌వ్యాల వంటి పెను స‌మ‌స్య‌ల‌కు నిషేధం అన్న ప‌రిష్కారం మార్గం ద‌గ్గ‌ర ద‌గ్గ‌రే ఆగిపోకుండా స‌మ‌స్య మూలాల‌ను అర్ధం చేసుకుని , విలువలు, క్ర‌మ‌శిక్ష‌ణ‌, స్వీయ‌నియంత్ర‌ణ వంటి విష‌యాల్లో విద్యార్ధులకు మ‌రింత శిక్ష‌ణ ఇచ్చేందుకు విద్యా విధానంలో త‌గిన మార్పులు చేయాలి. అప్పుడు డ్ర‌గ్స్ మ‌హ‌మ్మారి ఎటువంటి నిషేధం అవ‌స‌రం లేకుండానే మ‌న దేశాన్ని వీడిపోతుంది.

 

(ఈ ఆర్టికల్ ను మీకు స్పాన్సర్ చేసినవారు)

 

‘పొగడ్త’ మంచిదే!!

 

త‌ల్లిదండ్రులుగా మార‌డం అన్న‌ది ప్ర‌తీ ఒక్క‌రి జీవితంలో ఒక మ‌ధురానుభూతి. పిల్లలు పుట్టాకే మ‌నిషి జీవితం ఒక అర్ధ‌వంత‌మైన మ‌లుపు తిరుగుతుంది. మ‌నిషిగా జీవితానికి ఒక సార్ధ‌క‌త ఏర్ప‌డుతుంది. అయితే పిల్ల‌ల పెంప‌కం అనేది అంత సులువైన‌ విష‌యం కాదు. పిల్ల‌ల వ‌య‌స్సు ఎంత ఉన్న కానీ త‌ల్లిదండ్రుల బాధ్యత అన్న‌ది తీరిపోయేది కాదు. పిల్ల‌లను ఎలా ప్రేమించాలి? వాళ్ల‌కు భ‌ద్ర‌మైన వాతావ‌ర‌ణం ఎలా క‌ల్పించాలి? ఏది మంచి..ఏది చెడు అన్న‌ది విడ‌మ‌ర్చి చెప్ప‌డం.? అన్న‌ది నిరంత‌రం సాగే ప్ర‌క్రియ‌. చివ‌రికి ఒక పిల్ల‌వాడు స్వ‌తంత్రంగా, విలువ‌ల‌తో, పెద్ద‌ల ప‌ట్ల గౌర‌వంతో, పూర్తి ఆత్మ‌విశ్వాసంతో ఎంత బాగా ఎదిగాడ‌న్న‌ది త‌ల్లిదండ్రుల పెంప‌కంపై ఆధార‌ప‌డి ఉంటుంది. మంచి స‌మ‌ర్ధ‌త క‌లిగిన త‌ల్లిదండ్రులు మాత్రమే మ‌న ఇప్పుడు చెప్పుకున్న ల‌క్ష‌ణాల‌తో త‌మ పిల్ల‌ల‌ను పెంచ‌గ‌ల‌రు. అంద‌రూ తాము మంచి తల్లిదండ్రులుగా ఉంటూ త‌మ పిల్ల‌ల‌ను బాగా పెంచాల‌ని అనుకుంటారు. అయితే చివ‌రికి కొంద‌రు మాత్ర‌మే మంచి త‌ల్లిదండ్రులు అనిపించుకుంటారు. అయితే కొన్ని జాగ్ర‌త్త‌లు తీసుకుంటే అంద‌రూ త‌మ పిల్ల‌ల‌కు మంచి పెంప‌కాన్ని అందించి గుడ్ పేరెంట్స్ గా మారొచ్చు. పిల్ల‌ల‌కు అంద‌మైన భవిష్య‌త్ ను కానుక‌గా ఇవ్వొచ్చు.

 

 

మీ పిల్ల‌ల‌కు ప్రేమ‌, ఆప్యాయ‌త‌ల‌ను పంచిపెట్టండి!

 

మీ పిల్ల‌ల‌కు ప్రేమ‌ను అందిస్తూ వాళ్ల‌తో ఆప్యాయంగా మెల‌గ‌డం అన్న‌ది పేరెంటింగ్ లో చాలా కీల‌కం. ప్రేమ అనేదే పిల్ల‌ల‌తో మీ బంధానికి పునాది. ఒక వెచ్చ‌ని స్ప‌ర్శ‌, ఒక భ‌ద్ర‌త‌తో కూడిన కౌగిలి వాళ్ల‌ను మీకు మానసికంగా చాలా ద‌గ్గ‌ర చేస్తాయి. చ‌క్క‌టి అనుబంధంతో త‌ల్లిదండ్రులతో పెరిగిన పిల్ల‌లు ఉన్న‌త స్థానానికి ఎదిగిన‌ట్టు శాస్త్రీయ ప‌రిశోధ‌న‌లు రుజువు చేస్తున్నాయి. ఒక అప్యాయ‌పూరిత కౌగిలి, మొఖంపై చ‌క్క‌ని చిరున‌వ్వు, ఒక మెచ్చుకోలు, ప్రేమ‌తో కూడిన అనుమతి పిల్ల‌ల ఆత్మ‌విశ్వాసాన్ని పెంచుతుంది. ప్ర‌తీ రోజూ వాళ్ల‌ను మీరు ఎంత ప్రేమిస్తున్నారో తెలియ‌జేయండి. కోపంలో ఉన్నాస‌రే వాళ్ల‌పై మీకు ఎంత ప్రేమ ఉంద‌న్న విష‌యం వాళ్ల‌కు తెలియాలి. మీ పిల్ల‌లు పుట్టిన ద‌గ్గ‌ర్నుంచి వాళ్ల‌కు వీలైన‌ప్పుడ‌ల్లా కౌగిలించుకొండి. వాళ్ల‌కు ఇబ్బంది లేకుండా ముద్దు పెట్టండి. స్ప‌ర్శ ద్వారా భద్రతను, ప్రేమను ఫీల్ అవుతారు. ఇది వాళ్లకు మానసిక ఎదుగులకు చాలా ముఖ్యమని పరిశోధకులు చెపుతున్నారు. తల్లిదండ్రులు పిల్లలకు హద్దులు లేని ప్రేమను అందివ్వాలి. మీరు మా ప్రేమను పొందాలంటే ఫలానా విధంగా చేయాలి? ఈ పనులు చేస్తేనే మిమ్మల్ని ప్రేమిస్తాం..వంటి మాటలు పిల్లలు దగ్గర అస్సలు ఉపయోగించకండి.

 

 

మెప్పుకోలు పిల్లలకు ఉత్సాహాన్ని ఇస్తుంది!

 

పొగడ్త , మెచ్చుకోలు అనేది ఎవరికైనా సరికొత్త ఉత్సాహాన్ని ఇస్తుంది. ఇది పిల్లల పెంపకంలోనూ కీలక పాత్ర పోషిస్తుంది. వాళ్లు ఏదైనా ఒక మంచి పని చేయగానే మనస్ఫూర్తిగా అభినందించి, ఆ పని చేసినందుకు వాళ్లను మెచ్చుకోండి. ఇది వాళ్లకు ఎనలేని శక్తిని ఇస్తుంది. మీరు ఇలాంటి పని కనుక చేయకుంటే వాళ్లు తమపై తాము నమ్మకం కోల్పోయి మెల్లగా ఈ ప్రపంచం నుంచి వేరై తమను తాము ఎందుకు పనికిరానివారుగా భావించుకుంటారు. మీ పిల్లలను ఒక మంచి పని చేసినప్పుడు వాళ్లను బాగా మెచ్చుకోవడంతో పాటు ఏదైనా చెడ్డ పని చేసినప్పుడు సున్నితంగా మందలించాలి. అయితే నెగెటివ్ ఫీడ్ బ్యాక్ అనేది వాళ్లపై చాలా ప్రభావం చూపుతుంది. మందలించిటప్పుడు చాలా నెమ్మదిగా చెప్పి ఆ పని చేయడం వలన వచ్చే పర్యవసానాలు వివరించాలి. నువ్వు చాలా మంచి పిల్లాడివి కదా ఆ పని ఎందుకు చేసావు? అన్న రీతిలో ఆ మందలింపు ఉండాలి. పిల్లలకు ప్రోత్సాహం లభిస్తే అద్భుతాలు సృష్టిస్తారు. అయితే మెచ్చుకోలు లో నిజాయితీ, వివరణ కూడా ఉండాలి.

 

 

ఇతరులతో మీ పిల్లలను అస్సలు పోల్చకండి

 

ప్రతీ పిల్లవాడు ఒక ప్రత్యేకం. తనదైన ప్రత్యేక లక్షణం, ప్రతిభతో ప్రతీ ఒక్కరిలో ఎనలేని శక్తి ఉంటుంది. ఇతరులతో పోల్చడం అనేది పిల్లల పెంపకంలో అస్సలు వద్దు. మిగిలిన పిల్లలతో పోల్చి నువ్వు ఎందుకూ పనికిరావు అన్న ఒక వ్యాఖ‌్య మీ పిల్లవాడిని పాతాళంలోకి తోసేస్తుంది. ఆత్మవిశ్వాసాన్ని కోల్పోయి నిజంగానే ఎందుకూ పనికిరాకుండా పోతాడు. పిల్లలపై విష‍యంలో తల్లిదండ్రులు ఎప్పుడూ ప్రతికూల వ్యాఖ్యలు చేయకూడదు. ఇలా చేయడం వలన వాళ్లలో ఆత్మన్యూనతా భావం పెరిగిపోతుంది. ఈ సృష్టిలో మీ పిల్లవాడు ఒక ప్రత్యేకమైన వాడు. అతన్ని అతని తోబుట్టువులతోనూ ఇతర స్నేహితులతోనూ ఎప్పుడూ పోల్చకండి. అతను ఇక్కడ మిగిలిన వాళ్లతో పోటీపడటానికి, వాళ్లలా మారడానికి లేడు. తనదైన ప్రతిభతో తన ప్రత్యేకతను చాటుకుంటూ స్వేచ్ఛగా ఎదిగేందుకు సృష్టించబడ్డాడు. అలాగే పిల్లల్లో ఎవర్నో ఒకర్ని ఎక్కువగా ఇష్టపడటం మిగిలిన వారిని అంతగా ఇష్టపడకపోవడం అన్నది కూడా చాలా తప్పు. అలా చేయడం పిల్లల ఎదుగుదలన తీవ్రంగా ప్రభావితం చేస్తుంది. పెంపకంలో పిల్లల మధ్య వ్యత్యాసం చూపించడం వాళ్లను మానసికంగా కుంగదీస్తుంది.

 

 

పిల్లలు చెప్పింది వినండి!

 

మీ పిల్లలతో మీకెప్పుడూ ఆరోగ్యకరమైన సంభాషణ ఉండాలి. మీరు చెప్పింది వాళ్లు వింటున్నట్టే వాళ్లు చెప్పింది కూడా మీరు ఓపిగ్గా వినండి. వాళ్లు మనసులో ఏమనుకుంటున్నారో , వాళ్లు మీతో చెప్పాలనుకుంటున్నారో అర్ధం చేసుకోండి. మీతో ఏ విష‍యమైనా స్వేచ్ఛగా చెప్పగలిగే వీలు కల్పించండి. అప్పుడే వాళ్లు మీతో స్నేహితులుగా ఉంటారు. లేదంటే అన్ని విషయాలు తమలో దాచుకుని సమస్యకు సరైన పరిష్కారం కనుక్కోలేక తప్పుడు సలహాలతో దారి తప్పుతారు. పిల్లవాడు సందిగ్దంలో ఉన్నప్పుడు అతనికి మంచి సలహా చెప్పే స్నేహితుడు మీరే కావాలి. ప్రతీరోజూ పడుకునే ముందు కానీ బ్రేక్ ఫాస్ట్ సమయంలో కానీ వాళ్లతో కొంచెం సమయం గడపండి. పిచ్చాపాటీ మాట్లాడండి. మీరెప్పుడు మీ పిల్లవాడి తెలివిని తక్కువ అంచనా వేయకండి. వాళ్లు చెప్పాలనుకుంటున్న విషయాన్ని శ్రద్ధగా వినండి. వాళ్లకు తగిన ధైర్యం ఇవ్వండి.

 

 

మీ పిల్లల కోసం సమయాన్ని సృష్టించుకోండి!

 

ప్రస్తుతం చాలా మంది తల్లిదండ్రులు తమ పిల్లల కోసం అస్సలు సమయమే కేటాయించలేకపోతున్నారు. మీరు మీ పిల్లల కోసం తగినంత సమయం కేటాయించలేకపోతున్నారంటే మీరే దేనికోసమైతే పగలు రాత్రీ కష్టపడుతున్నారో అదంతా బూడిదలో పోసిన పన్నీరే అవుతుంది. మీ పిల్లలకు తగిన సమయం కేటాయించండి. వాళ్లతో మాట్లాడండి. ఇద్దరు లేదా అంతకంటే ఎక్కువ మంది పిల్లలు ఉంటే ఒక్కొక్కరితో విడివిడిగా మాట్లాడండి. వాళ్లతో కొంచెం సమయం గడపండి. వాళ్లతో పార్క్ లకు జూకి, మ్యూజియం కు ఇలా వాళ్లకి ఇష్టమైన ప్రదేశానికి వెళుతూ ఉండండి. వాళ్ల స్కూల్ ఫంక్షన్ కు హాజరుకండి. అలాగే పిల్లల ప్రవర్తనపై టీచర్ తో మాట్లాడండి. వాళ్ల చదువు గురించి టీచర్ తో చర్చించండి.

 

(ఈ ఆర్టికల్ ను మీకు స్పాన్సర్ చేస్తున్నవారు)

 

 

పిల్ల‌లు చెప్పింది పెద్ద‌లు వినాలి!!

 

పిల్ల‌ల‌కు తల్లిదండ్రులే ఆది గురువులు. స్కూల్ కు వెళ్ల‌కుముందు వెళ్లిన త‌ర్వాత కూడా పిల్ల‌లు చాలా విష‌యాల‌ను త‌ల్లిదండ్రుల నుంచే నేర్చుకుంటారు. ఆత్మ‌విశ్వాసం, ఆస‌క్తి, మ‌ర్యాద‌, శ్ర‌ద్ధ ఇలా ఏ విష‌య‌మైనా పిల్ల‌లు పేరెంట్స్ నే ఆద‌ర్శంగా తీసుకుంటారు. పిల్ల‌ల‌కు ఆద‌ర్శంగా ఉండ‌టం అనేదే పేరెంటింగ్ లో అతిముఖ్య‌మైన స‌వాలు. ఈ స‌వాలును స్వీక‌రించి నిజాయితీతో, గౌర‌వంతో, ఆద‌ర్శ‌ప్రాయ‌మైన జీవన విధానాన్ని ఎవ‌రు ఆచ‌రిస్తారో వాళ్ల పిల్ల‌లు మాత్ర‌మే ఆరోగ్య‌క‌ర‌మైన వాతావ‌ర‌ణంలో పెరుగుతున్న‌ట్టు. ముఖ్యంగా కొత్త‌గా బ‌య‌టి ప్ర‌పంచంలోకి వెళ్లిన‌ప్పుడు పిల్ల‌ల చిన్ని బుర్ర‌లో ఎన్నో సందేహాలు, ప్ర‌శ్న‌లు పుడ‌తాయి. వాటిని జాగ్ర‌త్త‌గా త‌మ చిన్ని బుర్ర‌లో దాచుకుని వాటికి స‌మాధానాలు చెప్ప‌మ‌ని త‌ల్లిదండ్రుల‌ను అడుగుతారు. కానీ కెరీర్ కే అధిక ప్రాధాన్య‌త‌నిస్తున్న ఈ త‌రం త‌ల్లిదండ్రులకు పిల్ల‌ల సందేహాల‌ను తీర్చేందుకు స‌మ‌య‌మూ, ఓపిక రెండూ ఉండ‌టం లేదు. ఈ ప‌రిణామం పిల్ల‌ల మానసిక ఎదుగుద‌ల‌పై తీవ్ర ప్ర‌భావాన్ని చూపిస్తుంది.

 

 

పేరెంటింగ్ లో మొద‌టి మెట్టు ఓపిక‌ను పెంచుకోవ‌డ‌మే!

 

 

ఒక జంట పిల్ల‌ల్ని క‌న‌డానికి సిద్ధ‌మ‌వ‌డం అంటే త‌మ‌ను తాము పూర్తిగా మార్చుకోవ‌డానికి సిద్ధ‌ప‌డ‌ట‌మే. ఎందుకంటే ప్ర‌స్తుత కాలంలో పిల్ల‌ల్ని పెంచ‌డం అనేది ఆషామాషీ విష‌యం కాదు. శారీర‌కంగా, మాన‌సికంగా పూర్తి స్థాయిలో సంసిద్ధ‌మైతేనే ఈ పెద్ద‌ బాధ్య‌తను విజ‌య‌వంతంగా నిర్వ‌ర్తించేందుకు వీలు క‌లుగుతుంది. ముఖ్యంగా వైఖ‌రి ప‌రంగా భావోద్వేగాల‌ను అదుపు చేసుకుని ఓపిక‌ను పెంచుకోవ‌డ‌మే పిల్ల‌ల పెంప‌కంలో మొద‌టి మెట్టు. ఎందుకంటే శైశ‌వ ద‌శ నుంచి కౌమారం వ‌ర‌కూ పిల్ల‌లు ప్ర‌తీ క్ష‌ణం తల్లిదండ్రుల ఓపిక‌కు ప‌రీక్ష పెడుతూనే ఉంటారు. ముఖ్యంగా అప్పుడే స్కూల్ కు వెళ్తున్న పిల్ల‌లు త‌ల్లిదండ్రుల ఓపిక‌ను ప‌రీక్షిస్తారు. తాము చూసిన తాము నేర్చుకున్న విష‌యాల‌ను ఇంటికి రాగానే త‌ల్లిదండ్రుల‌కు గుక్క తిప్పుకోకుండా చెపుతారు. ఎన్నో ప్ర‌శ్న‌లు అడుగుతారు. అలాగే తాము నేర్చుకున్న విష‌యాన్ని త‌ల్లిదండ్రుల ద‌గ్గ‌ర ప్రద‌ర్శించ‌డానికి ఆస‌క్తి చూపిస్తారు. అయితే వాళ్ల ఉత్సాహాన్ని చాలా మంది పేరెంట్స్ నీరుగారుస్తారు. వాళ్ల చెప్పే విష‌యాల‌ను వినేందుకు ఓపిక లేక వాళ్ల‌పై చిరాకు ప‌డ‌తారు.

 

 

పిల్ల‌ల మాట‌ల ప్ర‌వాహానికి అడ్డుక‌ట్ట వేయ‌కండి!

 

పిల్లలు ఉత్సాహంగా చెపుతున్న విష‌యాలకు, క‌బుర్ల‌కు, ప్ర‌శ్న‌ల‌కు అస్స‌లు అడ్డుక‌ట్ట వేయ‌కండి. వాళ్లు చెప్పింది శ్ర‌ద్ధగా , ఆస‌క్తిగా వినండి. ఆ వినడంలో ఒక‌ర‌క‌మైన ఉత్సాహాన్ని చూపించండి. తాము చెపుతున్న విషయం త‌ల్లి లేదా తండ్రి ఆస‌క్తిగా విన‌డం అన్న‌ది పిల్ల‌లకు ఆనందాన్ని క‌లిగిస్తుంది. పిల్ల‌లు అడిగే ప్ర‌శ్న‌ల‌కు విసుగు క‌న‌బ‌ర్చ‌కుండా ప్రేమ‌తో స‌మాధానాలు చెప్పాలి. వాళ్లు అడిగిన ప్ర‌శ్న‌నే ప‌దే ప‌దే అడుగుతున్నా స‌రే. చిరాకును ప్ర‌ద‌ర్శించ‌కూడ‌దు. పిల్ల‌లు మిమ్మ‌ల్ని ప్ర‌శ్న‌లు అడుగుతున్నారు అంటే బ‌య‌ట ప్ర‌పంచంలో వాళ్లు చాలా విష‌యాల‌ను చూసి అవి ఏంటి అనే జిజ్ఞాస‌ను పెంచుకుంటున్నార‌ని అర్ధం. అన్నీ తెలుసుకోవాల‌న్న వాళ్ల జిజ్ఞాస‌ను ఆదిలోనే చిదిమేయ‌కండి. ఎంత బిజీగా ఉన్నా స‌రే వాళ్లు అడిగే ప్ర‌శ్న‌ల‌కు ఓపిగ్గా స‌మాధానం చెప్పాలి. వాళ్లు చెప్పే విష‌యాల ద్వారా స్కూల్ బ‌స్ లోనూ, స్కూల్ లోనూ, ట్యూష‌న్ లోనూ ఏం జ‌రుగుతుందో తెలుసుకునేందుకు వీలు క‌లుగుతుంది. ఏదైనా అస‌హ‌జంగా అనిపిస్తే వెంట‌నే త‌గిన చ‌ర్య‌లు తీసుకునేందుకు ఇది ఉప‌యోగ‌ప‌డుతుంది.

 

 

మీరు విన‌కుంటే ఇక చెప్ప‌డం మానేస్తారు!

 

త‌మ స్కూల్ లో బ‌య‌ట జ‌రిగిన విష‌యాల‌ను, చూసిన సంఘ‌ట‌న‌ల‌ను పిల్ల‌లు చెపుతున్న‌ప్పుడు శ్ర‌ద్ధ‌గా విన‌డం ఒక్క‌టే కాదు వాళ్లు వాస్త‌వానికి ఏం చెప్పాల‌నుకుంటున్నారో అర్ధం చేసుకోవాలి. నాలుగైదు సంద‌ర్భాల్లో మీరు స‌రైన ప్ర‌తిస్పంద‌న లేకుండా వాళ్లు చెప్పిన విష‌యాన్ని విన‌డం లేద‌ని తెలిస్తే పిల్ల‌లు ఇక మీతో ఏ విష‌యం చెప్ప‌డం మానేస్తారు. అది దీర్ఘ‌కాలంలో మీకు మీ పిల్ల‌ల మ‌ధ్య దూరాన్ని పెంచుతుంది. అలా జ‌ర‌గ‌కుండా ఉండాలంటే మీ పిల్ల‌ల‌కు ఒక మంచి స్నేహితునిలా వాళ్లు చెప్పింది వింటూ స‌రైన స‌మాధానం , స‌ల‌హా ఇచ్చే స‌న్నిహితుని పాత్ర పోషించాలి. అలా మీకు ఫ్రెండ్స్ లా ఉంటేనే పిల్ల‌లు మీతో ఏదైనా విష‌యం చెపుతారు. మీరు వారు చిన్న ప్ర‌శ్న‌ల‌కు , స‌రైన స‌మ‌యానికి వాళ్ల‌కు కావాల్సి వ‌చ్చే స‌ల‌హాల‌ను ఇచ్చేందుకు మీరు అందుబాటులో లేకుంటే వాళ్లు కొత్త స్నేహితుల‌ను వెతుక్కుంటారు. వాళ్ల ప్ర‌శ్న‌లు, వాళ్ల బాధ‌ల‌ను చెప్పుకునేందుకు వేరే వాళ్ల‌ను వెతుక్కుంటారు. ఆ స్నేహితులు చెడ్డ వాళ్లు అయితే మీ పిల్ల‌లు కూడా చెడు దారిలోకి వెళ్లిపోతారు.

 

 

శిక్ష‌ణ‌తో రాటుదేలేలా చేయండి!

 

పిల్ల‌ల‌కు వారి వ‌య‌స్సుకు త‌గిన‌ట్టుగా ఏదైనా ఒక విష‌యంపై శిక్ష‌ణ ఇవ్వండి. అది క‌రాటే, కుంగ్ ఫూ, మ్యూజిక్, చిత్ర‌లేఖ‌నం ఏదైనా కావ‌చ్చు. ఇలా ఓ కొత్త విష‌యం, కొత్త ఆట‌, కొత్త నైపుణ్యం నేర్చుకోవ‌డం వ‌ల‌న పిల్ల‌ల్లో ఆత్మ‌విశ్వాసం పెరుగుతుంది.వాళ్ల‌కు సంబంధించిన చిన్న ప‌నులు వారే సొంతంగా చేసుకునేలా వాళ్ల ప‌నిపై వాళ్లే నిర్ణ‌యాలు తీసుకునేలా వాళ్ల‌ను ప్రొత్సాహించాలి. దీనివల‌న చిన్న‌తనం నుంచే త‌మ ప‌నులు తాము చేసుకోవ‌డం చిన్న ప‌నుల‌కు త‌ల్లిదండ్రుల మీద ఆధార‌క‌ప‌డ‌పోవ‌డం వాళ్ల‌కు అల‌వాట‌వుతాయి. అదే విధంగా వ‌య‌స్సుకు త‌గిన‌ట్టు వాళ్ల‌కు కొత్త పుస్త‌కాలు చ‌దివే అలవాటును కూడా నేర్పించాలి. విజ్ఞానం పెర‌గ‌డం అనేది వాళ్ల‌కు ఆత్మ‌విశ్వ‌సాన్నే కాదు ఒక విష‌యాన్ని విభిన్న కోణాల్లో చూసే శ‌క్తి వ‌స్తుంది. పిల్ల‌ల‌తో ఎప్పుడూ స్నేహితుల్లా ఉంటూ వారు అడిగే ప్ర‌శ్న‌లు విసుగు లేకుండా స‌మాధానం చెప్పిన‌ప్పుడే పెంప‌కంలో కీల‌క‌మైన ద‌శ‌లో విజ‌య‌వంత‌మైన‌ట్టు.

 

(ఈ ఆర్టిక‌ల్ ను మీకు స్పాన్స‌ర్ చేస్తున్న‌వారు)

 

పిల్లల్ని కనాలంటే ముందు గాలిపటం ఎగరేయడం తెలియాలి!!

 

ఈ ప్రపంచంలో తనను తాను తెలుసుకోవడం ఎంత కష్టమే పిల్లల పెంపకం కూడా అంతే కష్టం. ఆత్మ జ్జానాన్ని సంపాదించుకోలేక చాలా మంది తమ వ్యక్తిగత జీవితాలను చిక్కుల్లో పడేసుకుంటున్నారు. అలాగే పిల్లల పెంపకం అనే అర్హత సాధించకుండానే పసివాళ్ల జీవితాలను కూడా చిక్కుల్లో పడేస్తున్నారు. ముఖ‌్యంగా మన దేశంలో పిల్లల పెంపకం అనేది అత్యంత నిర్లక్ష్యానికి గురవుతున్న విషయం. మానసికంగా, శారీరకంగా ఆరోగ్యంగా ఉండి పిల్లల పెంపకంపై అవగాహన ఉన్న తల్లిదండ్రులే దేశానికి మంచి పౌరులను అందించగలరు. కానీ దురదృష్టవశాత్తూ మన దగ్గర పిల్లల పెంపకాన్ని ఒక అషామాషీ విషయంగా తీసుకుంటున్నారు. ఓ మేధావి చెప్పినట్టు పిల్లలను పెంచడం చేతకాకపోతే వాళ్లను కనడం అన్నది అత్యంత బాధ్యతారాహిత్యమైన విషయం. ఇజ్రాయెల్ వంటి కొన్ని దేశాల్లో పిల్లల పెంపకంపై తగిన శిక్షణ తీసుకుని మానసికంగా సిద్ధమయ్యాకే పిల్లలను కనేందుకు అక్కడ దంపతులు సిద్ధమవుతున్నారు.

 

 

మీకు పిల్లల్ని పెంచడం తెలుసా?

 

పూర్వం ఒక దేశంలో ఏ సమస్యనైనా చిటికెలో పరిష్కరించే మేధావి ఉండేవాడు. తన తెలివితేటలతో అందరి మన్ననలు పొందాడు. ఆ మేధావి పరిష్కరించని సమస్య అంటూ ఉండదని ప్రజలు భావించేవారు. అయితే అప్పటికే మధ్య వయస్సులోకి వచ్చిన ఆ మేధావి ఒకతను ఇలా ప్రశ్నించాడు. ‘అయ్యా తమరు ఇంకా పెళ్లి చేసుకోలేదు? మీకు పిల్లలు కూడా లేరు. ఎందుకు?’ అని అడిగాడు. దానికి ఆ మేధావి ఇలా సమాధానం చెప్పాడు. ‘నాకు పిల్లల్ని పెంచడం అస్సలు చేతకాదు. అది అంత సులువైన విషయమేమీ కాదు. నా పిల్లలు సమాజాన్ని పాడు చేయడం నాకిష్టం లేదు. నేను సరైన పెంపకం కనుక చేయకుంటే నా పిల్లలు సమాజాన్ని మలినం చేసే వ్యక్తులుగా తయారవుతారు.’ అని చెప్పాడు. ఈ కథలో మనం నేర్చుకోవాల్సింది ఏంటంటే పిల్లల పెంపకం అనేది మనం ఒక ఆరోగ్యకరమైన వాతావరణంలో అత్యంత శ్రద్ధగా చేయాల్సిన పని. ఇందులో ఏమాత్రం తేడా వచ్చినా మనం దేశానికి , సమాజానికి బాధ్యత లేని తరాన్ని అందించినట్టే. ఆ తరం అక్కడితో ఆగిపోతుంది అనుకుంటే పొరపాటు . తల్లిదండ్రుల నిరాదరణకు గురైన సరైన పద్ధతిలో పెరగని ఒక పిల్లవాడు తాను పెద్దవాడు అయ్యాక తన పిల్లలను సరైన మార్గంలో ఎలా పెంచగలడు?

 

 

మీ పిల్లల బాల్యం మీ చేతుల్లో ఉంది!

 

ప్రతీ ఒక్కరు జీవితంలో గడిచిపోయిన తమ బాల్యాన్ని గుర్తు చేసుకుని చింతిస్తూ ఉంటారు. బాల్యంలో తన జీవితం ఎంత అద్భుతంగా ఉండేదో కదా అని ఆలోచిస్తూ ఉంటారు. కానీ మీరు కోటీశ్వరులైనా, మిలియన్ డాలర్లు వెచ్చించినా సరే మీ బాల్యాన్ని మీరు వెనక్కి తీసుకురాలేరు..కదా ..ఎందుకంటే అది మీ చేతుల్లో లేదు. కానీ మీ పిల్లల బాల్యం మాత్రం కచ్చితంగా మీ చేతుల్లో ఉంది. వాళ్య బాల్యాన్ని వాళ్ల జీవితాన్ని అత్యద్భుతంగా తీర్చిదిద్దే అవకాశం మనకు ఉంది. వాళ్లకు అప్యాయత, అనురాగం, ప్రేమతో కూడిన స్పర్శ ను అందిస్తూ ఒక మంచి వాతావరణంలో పెంచితే అదే వాళ్లకు మీరు ఇచ్చే అందమైన, అద్భుతమైన బహుమతి అవుతుంది. చాలా మంది తల్లిదండ్రులు పిల్లలకు భవిష్యత్ లో మంచి జీవితాన్ని ఇచ్చేందుకు వాళ్లతో సరైన సమయం కూడా గడపకుండా పని పని అంటూ ఉరుకులు పరుగులు పెడుతూ ఉంటారు. అది సరైన పద్ధతి కాదు. మీరు పెద్దయ్యాక అతనికి కోట్ల రూపాయలు ఇచ్చినా అతను కోట్ల రూపాయలు సంపాదించినా తన బాల్యాన్ని మాత్రం వెనక్కు తెచ్చుకోలేడు కదా? కాబట్టి డబ్బు సంపాదనతో పాటు మీ పిల్లలతో నాణ్యమైన కొన్ని గంటలు గడిపేందుకు వారిని ప్రేమతో పెంచేందుకు, వారి బాల్యాన్ని సుసంపన్నం చేసే తగిన సమయపట్టిక వేసుకోండి.

 

 

పిల్లల పెంపకం గాలిపటం ఎగరేయడం లాంటిది!

 

మనం గాలిపటం ఎగరవేసేటప్పుడు ఎంత చాకచక్యంగా వ్యవహరిస్తారం. గాలిపటం కు స్వేచ్ఛ వచ్చే వరకూ జాగ్రత్తగా, మెల్లగా పైకి తీసుకెళ్తాం. తర్వాత దానికి మరింత స్వేచ్ఛనిచ్చి ఇంకాస్త పైకి వదులుతాం. ఇంకా నమ్మకం కుదిరాక మరింత పైకి వెళ్లనిస్తాం. కానీ ఇవన్నీ చేస్తున్నా నియంత్రణ పై మాత్రం పట్టు కోల్పోకుండా చూసుకుంటాం. ఎందుకంటే ఒక్కసారి నియంత్రణ కోల్పోతే గాలి పటం మీ చేతినుంచి చేజారినట్టే. స్వేచ్ఛ , నియంత్రణల సమన్వయమే గాలిపటం ఎగరేయడంలో మూల సూత్రం. ఇదే సూత్రం పిల్లల పెంపకానికి వందశాతం వర్తిస్తుంది. పిల్లలకు తగినంత స్వేచ్ఛనిస్తూనే వాళ్లకు ఏ సమయంలో నియంత్రణ అవసరమో తెలుసుకుని అప్పుడు దాన్ని అమల్లో పెట్టడం తెలియాలి. లేకుంటే మరింత పైకి వెళ్లి నియంత్రణ కోల్పోయిన గాలిపటంలా మీ పిల్లల జీవితం కూడా మీ చేతుల్లోంచి జారిపోతుంది. చెట్టు పెరిగే క్రమంలో చిన్న చిన్న కొమ్మలను తొలిగించిన అది నిటారుగా పెరిగేట్టు ఏ విధంగా చేస్తామో పిల్లల పెంపకంలో కూడా అటువంటి జాగ్రత్తలు తీసుకోవాలి. వారి ఎగుదలలకు అడ్డంకిగా మారిన విషయాలను ఎప్పటికప్పుడు చాకచక్యంగా తొలిగించాలి. వారు మరింత ఉన్నతంగా ఎదిగేందుకు అవసరమైన చర్యలు తీసుకోవాలి.

 

 

పిల్లల సామ్రాజ్యానికి పిల్లలే రాజులు!

 

పిల్లల పెంపకంలో మొదటి ఐదేళ్లు చాలా కీలకమైనవి. బడిలో చేరకముందు తల్లిదండ్రుల చెంత తీరుబడిగా నేర్చుకునే విషయాలు అతని జీవితంలో అత్యంత అమూల్యమైనవి. ప్రేమతో , అప్యాయతతో కూడిన స్పర్శతో తల్లిదండ్రులతో గడిపే ఆ క్షణాలు వాళ్లను మానసికంగా, శారీరకంగా ఆరోగ్యవంతులను చేస్తాయి. మనం ముందు చెప్పుకున్నట్టు పిల్లల పెంపకం అంత ఆషామాషీ విషయం కాదు. ఎందుకంటే పిల్లల రాజ్యం ఒక గాజుమేడ. అందులో ఉన్న పిల్లవాడు రాయి విసిరినా, బయట ఉన్న వాళ్లు రాయి విసిరినా కూలేది, పగిలేది పిల్లల రాజ్యమే. నష్టపోయేది పిల్లవాడే. కాబట్టి ఎట్టి పరిస్థితుల్లోనూ పిల్లల కలల రాజ్యాన్ని నిర్మించడంలో రాజీ పడొద్దు. వాళ్లకు ప్రేమను, అప్యాయతను అందించండి. విలువలతో ఎలా బతకాలో నేర్పించండి. స్వేఛ్చనిస్తూనే నియంత్రణ చేయండి. తప్పటడుగులు వేస్తున్నప్పుడు సరి చేయండి. తప్పటడుగులు తప్పిదాలుగా మారకుండా జాగ్రత్త పడండి. అంతేకానీ పిల్లలను గాలికొదిలి వాళ్ల భవిష్యత్ కోసం డబ్బులు సంపాదిస్తాం అని చెప్పకండి. అన్ని విధాలుగా పతనమైన వాడికి డబ్బులు ఇచ్చి ఏం చేస్తారు? మనం ముందే చెప్పుకున్నాం. పిల్లల పెంపకం చాలా కష్టతరమైన విష‍యం అని. మరి ఆ కష్టతరమైన విషయాన్ని అర్ధం కాకుండే నేర్చుకోండి. అవసరమైతే శిక్షణ తీసుకోండి. అంతే కానీ మీ పిల్లల పెంపకం విష‍యంలో రాజీపడకండి.

 

( ఈ ఆర్టికల్ ను మీకు స్పాన్సర్ చేస్తున్నవారు) 

 

ఆలోచించండి ఓ అమ్మా నాన్నా..!!

 

ఈ సృష్టిలో ప్ర‌తీ జీవీ త‌న పిల్ల‌ల‌పై అమిత‌మైన ప్రేమ‌ను క‌లిగి ఉంటుంది. అంతెందుకు ర‌క్తం తాగే క్రూర జంతువులు కూడా త‌మ పిల్ల‌ల‌ను కంటికి రెప్ప‌లా కాపాడుకుంటాయి. త‌న పిల్ల‌ల‌కు హాని క‌లుగుకుండా ప్రాణాలను ఫ‌ణంగా పెట్టి కాపుకాస్తాయి. అయితే ప్రాణుల‌న్నింటిలోకి ఉన్న‌తుడ్ని అని చెప్పుకునే మ‌నిషి మాత్రం నోరులేని జంతువులు చూపిస్తున్న పాటి ప్రేమ‌ను త‌న పిల్ల‌ల‌పై చూపించ‌లేక‌పోతున్నాడు. పిల్ల‌ల‌పై క‌ఠినంగా వ్య‌వ‌హ‌రిస్తూ పాశ‌వికంగా హింసించే త‌ల్లిదండ్రులు రోజురోజుకీ పెరిగిపోవ‌డ‌మే దీనికి ప్ర‌త్య‌క్ష ఉదాహ‌ర‌ణ‌. చెప్పిన మాట స‌రిగ్గా విన‌లేద‌ని గ‌దిలో పెట్టి చిత్ర‌హింస‌లు పెట్టే త‌ల్లిదండ్రులు కొంద‌రైతే, త‌మ స‌ర‌దాల‌కు అడ్డు ప‌డుతున్నార‌ని వాళ్ల‌ను దారుణంగా వేధిస్తున్న వాళ్లు మ‌రికొంద‌రు. హైద‌రాబాద్ లో ప్ర‌త్యూషను పిన‌త‌ల్లితో క‌లిసి గృహ నిర్భందం చేసి తండ్రి ఎన్ని హింస‌లు పెట్టాడో అంద‌రికీ తెలిసిందే. ప్ర‌త్యూష ఒక్క‌ర్తే కాదు ప్ర‌త్యూష లాంటి ఎంద‌రో చిన్నారులు స్వంత త‌ల్లిదండ్రుల చేతుల్లోనే న‌ర‌కం అనుభిస్తున్నారు. స‌మాజంలో వ‌స్తున్న విప‌రీత మార్పుకు ఇది ఓ సంకేతంలా క‌నిపిస్తోంది. ఇంటి నుంచి స్కూల్ వ‌ర‌కూ ఎన్నో వేధింపులకు గుర‌వుతున్న బాల‌లు సొంత పేరెంట్స్ చేతిలో కూడా వేధింపుల‌కు గురైతే ఆ బాధ వ‌ర్ణ‌నాతీతం.

 

 

ఈ మానసిక వైక‌ల్యం భావి త‌రాల‌కు శాపం!

 

ఎంత‌కీ ఏడుపు ఆప‌డం లేద‌ని ఏడాదిన్న‌ర వ‌య‌స్సున్న త‌న కూతుర్ని డ్రైనేజీలోకి విసిరేసాడు ఓ పాపిష్టి తండ్రి. దేశ రాజ‌ధాని ఢిల్లీలో జ‌రిగిందీ ఈ దారుణ సంఘ‌ట‌న‌. బెంగ‌ళూరులో త‌నను విసిగిస్తోంద‌ని క‌న్న కూతుర్నే బిల్లింగ్ మీద నుంచి కింద‌కు విసిరేసింది మ‌రో త‌ల్లి. ఇవి కొన్ని ఉదాహ‌ర‌ణలు మాత్రమే. ప్ర‌తీ రోజు చాలా మంది చిన్నారులు త‌ల్లిదండ్రుల చేతుల్లో హింస‌కు గుర‌వుతున్నారు. కంటికి రెప్ప‌లా కాపాడాల్సిన త‌మ చిన్నారుల‌ను త‌ల్లిదండ్రులు ఎందుకు వేధిస్తున్నార‌న్న‌దే ఇప్పుడు ఆందోళ‌న క‌లిగిస్తున్న విషయం. పిల్ల‌ల‌ను వేధిస్తున్న త‌ల్లిదండ్రుల సంఖ్య ప్ర‌తీ ఏడాది పెరుగుతూనే ఉంది. ప్ర‌పంచ వ్యాప్తంగా చేసిన స‌ర్వేను తీసుకుకుంటే ప్ర‌తీ 10 మంది పిల్ల‌ల్లో 5 గురు మానసిక హింస‌కు గుర‌వుతున్న‌ట్టు తెలుస్తోంది. కొంద‌రు త‌ల్లిదండ్రులు పిల్ల‌ల ప‌ట్ల నిర్ల‌క్ష్యంగా వ్య‌వ‌హ‌రిస్తుంటే మ‌రికొంద‌రు ఎమోష‌న‌ల్ గా శారీర‌కంగా వారిని హింసిస్తున్నారు. ముఖ్యంగా క్ర‌మ‌శిక్ష‌ణ పేరిట చాలా మంది త‌ల్లిదండ్రులు త‌మ‌కు తెలియ‌కుండానే పిల్ల‌ల‌ను హింస‌కు గురిచేస్తున్నారు. మ‌రికొంద‌రు కుటుంబ క‌ల‌హాలు, ఆస్తి త‌గాదాలు నేప‌థ్యంలో పిల్ల‌ల్ని పావులుగా వాడుకుంటూ వాళ్ల‌ను హింసిస్తున్నారు.

 

 

ఎందుకు సొంత పిల్ల‌ల్నే చంపుకు తింటున్నారు?

 

గ‌డిచిన కొన్నాళ్లుగా స‌మాజంలో స్ప‌ష్ట‌మైన మార్పు వ‌చ్చింది. సామాజికంగా, ఆర్థికంగా ఉన్న‌తంగా ఉండాల‌న్న ఒక‌ర‌క‌మైన ఒత్తిడి, అవ‌స‌రం మ‌నిషికి ఏర్ప‌డింది. ఈ క్ర‌మంలో భావోద్వేగాల‌ను అదుపు చేసుకోవ‌డం ఎవ‌రికీ చేత‌కావ‌డం లేదు. దీనికి తోడు పిల్ల‌ల‌ను త‌మ‌ క‌ల‌లు, ఆకాంక్ష‌లు నెర‌వేర్చే మెషిన్లుగా చాలా మంది త‌ల్లిదండ్రులు చూస్తున్నారు. అంతేకానీ వాళ్ల అభిరుచులు,ఆస‌క్తులను తెలుసుకునేందుకు ప్ర‌య‌త్నించ‌డం లేదు. పైగా పిల్ల‌ల‌ను ఎమోష‌నల్ బ్లాక్ మెయిల్ చేస్తూ మాన‌సికంగా హింస‌కు గురిచేస్తున్నారు. దీంతో త‌మ‌కు న‌చ్చిన ప‌ని చేయ‌లేక‌, త‌ల్లిదండ్రుల ఆశ‌ల‌ను తీర్చ‌లేక చాలా మంది పిల్ల‌లు నలిగిపోతున్నారు. మ‌రికొన్ని కేసుల్లో త‌ల్లిదండ్రుల్లో ఎవ‌రికో ఒక‌రికి మానసిక స‌మ‌స్య‌లు ఉండ‌టంతో వాళ్లు పిల్ల‌ల‌ను అత్యంత దారుణంగా హింస‌కు గురిచేస్తున్నారు. అదే విధంగా సోష‌ల్ మీడియా వినియోగం పెరిగాక వాటి మాయ‌లో ప‌డి కొంద‌రు పేరెంట్స్ పిల్ల‌ల ఆల‌నా పాల‌నా కూడా స‌రిగా ప‌ట్టించుకోవ‌డం లేదు. ఇక ఆర్థికంగా దిగువ స్థాయిల్లో ఉన్న కుటుంబాల్లో కొంద‌రు త‌ల్లిదండ్రులు మద్యానికి బానిస‌లై చిన్న పిల్ల‌ల‌ను హింసించ‌డం, బాల కార్మికులుగా మార్చ‌డం, మానసిక వేధింపుల‌కు గురి చేయ‌డం వంటి ప‌నుల‌కు పాల్ప‌డుతున్నారు. కొన్ని కేసుల్లో సొంత త‌ల్లిదండ్రులే త‌మ పిల్ల‌ల్ని చంపిన ఘ‌ట‌న‌లు వెలుగు చూసాయి.

 

 

ఈ వేధింపులు భ‌విష్య‌త్ ను చిదిమేస్తున్నాయి!

 

చిన్న‌త‌నంలో మానసిక‌, శారీర‌క వేధింపుల‌కు గురైన వాళ్లు భ‌విష్య‌త్ లో తీవ్ర‌మైన మాన‌సిక స‌మ‌స్య‌ల‌కు గుర‌వుతార‌ని నిపుణులు చెపుతున్నారు. ఒత్తిడిని త‌ట్టుకోలేక పిరికివాళ్లుగానూ, హింస‌ను ఇష్ట‌ప‌డే సైకోలుగానూ మారిపోతున్నార‌ని ఆందోళ‌న వ్య‌క్తం చేస్తున్నారు. పుట్టిన ద‌గ్గ‌ర్నుంచి ఉన్న‌త చ‌దువుల‌కు వెళ్లే వ‌ర‌కూ పిల్ల‌ల‌పై త‌ల్లిదండ్రులు చూపే ప్రేమ వాళ్ల జీవితాన్ని నిర్దేశిస్తుంది. త‌ల్లిదండ్రుల ప్రేమ‌ను అనుభ‌విస్తూ పెరిగిన పిల్ల‌వాడు భవిష్య‌త్ లో త‌న జీవిత భాగ‌స్వామితోనూ, చుట్టూ ఉన్న మ‌నుష్య‌ల‌తోనూ అంతే ప్రేమ‌గా మ‌సులుకుంటాడు. అలా కాకుండా చిన్నత‌నంలో త‌ల్లిదండ్రుల చేతిలో హింస‌కు గురైన పిల్ల‌లు పెరిగి పెద్ద‌య్యాక అదే హింస‌ను కొన‌సాగిస్తున్న‌ట్టు స‌ర్వేలో తేలింది. త‌మ పిల్ల‌ల‌కు కూడా ప్రేమించుకుండా అదే హింస‌ను కొన‌సాగిస్తార‌ని ప‌రిశోధ‌న‌ల్లో తేలింది. చిన్న‌త‌నంలో తాము ఏదైతే హింస‌ను అనుభ‌వించామో అదే విధంగా కొన‌సాగించ‌డం వాళ్ల‌కు ఒక మాన‌సిక రుగ్మ‌త‌గా మారిపోతుంది. క్ర‌మ‌శిక్ష‌ణ పేరుతో మంచి భ‌విష్య‌త్ పేరుతో పిల్ల‌ల్ని హింసించే త‌ల్లిదండ్రులు చేతులారా త‌మ పిల్ల‌ల భ‌విష్య‌త్ ను చిదిమేస్తున్నార‌ని మానసిక నిపుణులు తేల్చేసారు. ఇక తాము ఏం చేయలేకపోయామో పిల్లలకు తాము చెప్పిందే చేయాలనుకునే మనస్తత్వం పిల్లల పెంపకాన్ని ప్రభావితం చేస్తుంది. అన్నింటికంటే పెంపకంలో తాము చేసిన తప్పులు, పొరపాట్లు తల్లిదండ్రులను ఎన్నటికీ వదిలిపెట్టవు. పేరెంట్స్ నుంచే పిల్లలు ప్రతీ విషయం నేర్చుకుంటారు. దాన్నే ఆచరణలో పెడతారు. 

 

 

పెంప‌కంలో త‌ల్లిదండ్రులు జాగ్ర‌త్త‌లు తీసుకోకుంటే జ‌రిగేవి అన‌ర్ధాలే!

 

ప్ర‌స్తుత స‌మాజంలో పిల్ల‌ల పెంప‌కం అనేది చాలా ముఖ్య‌మైన, క‌ష్ట‌మైన ప‌ని. ఈ పనిని విజ‌య‌వంతంగా నిర్వ‌ర్తించాలంటే త‌ల్లిదండ్రులు ముందునుంచీ త‌గిన జాగ్ర‌త్త‌లు తీసుకోవాలి. పిల్ల‌ల్ని క‌నాల‌ని ప్ర‌ణాళిక వేసుకున్న ద‌గ్గ‌ర్నుంచి ఒక ప‌ద్ధ‌తి ప్ర‌కారం పిల్లల పెంప‌కంపై అవ‌గాహ‌న పెంచుకోవాలి. పేరెంటింగ్ పై అవ‌స‌ర‌మైతే నిపుణుల స‌ల‌హాలు తీసుకోవాలి. పిల్ల‌ల‌కు త‌గిన విలువ‌లు, క్ర‌మ‌శిక్ష‌ణ నేర్పిస్తూనే అదే స‌మ‌యంలో వాళ్ల‌తో స్నేహితుల్లా , ప్రేమ‌గా మెల‌గడం వ‌ల‌న మంచి ఫ‌లితాలు వ‌స్తాయి. కానీ దుర‌దృష్ట‌వ‌శాత్తూ పిల్ల‌ల పెంప‌కంలో ఇప్పుడు అటువంటి వాతావ‌ర‌ణం కాన‌రావ‌డం లేదు. ఉద్యోగాల్లో కొంద‌రు బిజీ జీవితాలు గడుపుతుంటే మ‌రికొంద‌రు పిల్ల‌ల‌తో ఎలా వ్య‌వ‌హ‌రించాలో తెలియ‌క వాళ్ల భ‌విష్య‌త్ ను ప్ర‌మాదంలోకి నెడుతున్నారు. పిల్ల‌ల పెంప‌కం విష‌యంలో చాలా మంది త‌ల్లిదండ్రుల‌కు శిక్ష‌ణ అవ‌స‌ర‌మ‌ని నిపుణులు చెపుతున్నారు. ఉద్యోగాల‌ను, వ్యాపారాల‌ను, బిజీ లైఫ్ తో పాటు పిల్ల‌ల పెంప‌కాన్ని స‌మ‌న్వయం చేసుకోక‌పోతే వాళ్ల భ‌విష్య‌త్ ఎంత డ‌బ్బు కూడ‌బెట్టినా అవన్నీ బూడిద‌లో పోసిన ప‌న్నీరే.

 

( ఈ ఆర్టికల్ ను మీకు స్పాన్సర్ చేసినవారు)