పిల్ల‌ల ‘హాస్ట‌ల్’ కు పెద్ద‌ల ‘ఓల్డేజ్ హోమ్’ కు ఉన్న సంబంధం తెలుసా?

 

ఈ ఆధునిక యుగంలో పిల్ల‌ల పెంప‌కం అనేది అతిపెద్ద స‌వాలు. ఇది మ‌నం గ‌తంలో చెప్పుకున్న విష‌య‌మే అయినా ఇది అనుక్ష‌ణం గుర్తుపెట్టుకోవాల్సిన విష‌యం కాబ‌ట్టి మ‌రోసారి చెప్ప‌డం జ‌రిగింది. మీ పిల్ల‌ల‌ను మంచి పౌరులుగా తీర్చిదిద్దాల‌నుకుంటే ముందు మీరు మంచి పౌరులుగా త‌యారు కావాలి. ఎందుకంటే ఈ ప్ర‌పంచంలో పిల్ల‌ల‌కు త‌ల్లిదండ్రుల‌ను మించిన రోల్ మోడ‌ల్స్ ఎవ‌రూ ఉండ‌రు. చాలా మంది త‌ల్లిదండ్రులు తాము త‌మ పిల్ల‌ల‌కు మంచి పెంప‌కం అందిస్తున్నామ‌ని భ్ర‌మ‌ల్లో బ‌తుకుతూ పిల్ల‌ల జీవితాల‌తో పాటు త‌మ స్వంత జీవితాల‌ను కూడా ఇబ్బందుల్లో ప‌డేసుకుంటున్నారు. స‌రైన పెంప‌కం అందించ‌క‌పోతే పేరెంట్స్ జీవితాలు ఇబ్బందుల్లో ఎందుకు ప‌డ‌తాయి? అన్న సందేహం మీకు రావ‌చ్చు. తెలిసో తెలియ‌కో ఇప్పుడు మీరు మీ పిల్ల‌ల‌కు అంద‌కుండా చేస్తున్నవ‌న్నీ రేపు మీకు అంద‌కుండా పోతాయి. ఎందుకంటే వ‌ర్త‌మానంలో మ‌నం తీసుకున్న నిర్ణ‌యాలు, చేస్తున్న ప‌నులే మన భ‌విష్య‌త్ ను నిర్ణ‌యిస్తాయి. క్ర‌మ‌శిక్ష‌ణ పేరుతో పిల్ల‌ల్ని హాస్ట‌ల్ లో చేర్పిస్తున్న త‌ల్లిదండ్రులు త‌మ జీవిత చ‌ర‌మాంకంలో క‌చ్చితంగా వృద్ధాశ్ర‌మాల‌కు చేరుకోవాల్సి ఉంటుంద‌న్న క‌ఠిన స‌త్యాన్ని గుర్తించాలి.

 

 

భ‌విష్య‌త్ అంటే వ‌ర్త‌మాన‌మే!

 

తాజాగా ఒక ఉపాధ్యాయుడు పిల్ల‌ల పెంప‌కంపై ఒక అద్భుత‌మైన ప్ర‌సంగం ఇచ్చాడు. ప్ర‌స్తుత స‌మాజంలో జ‌రుగుతున్న విష‌యాలు, పిల్ల‌ల పెంప‌కంలో చోటుచేసుంటున్న మార్పులు, త‌ర్వాతి కాలంలో వీటి ప‌ర్య‌వ‌సానాలు ఇలా అత‌ను విభిన్న విష‌యాల‌ను ప్ర‌స్తావించాడు. ప్ర‌తీ విష‌యానికి పిల్ల‌ల‌ను ప్ర‌శ్నించ‌డం, లేదా వాళ్ల‌కు సూచ‌న‌లు చేయ‌డం..ప్ర‌తీ ఇంట్లోనూ ఇదే తంతు జ‌రుగుతుందని..కానీ పిల్ల‌ల‌తో కాస్త స‌మ‌యం మ‌న‌స్సు విప్పి మాట్లాడేందుకు ఏ తల్లిదండ్రులు సుముఖంగా లేర‌ని చెప్పాడు. ఈ రోజుల్లో చాలా మంది త‌ల్లిదండ్రులు ఎంత‌సేపు ఆదేశాలు జారీ చేస్తూ, ఆర్డ‌ర్లు వేస్తూ పిల్ల‌ల‌ను చేజేతులా దూరం చేసుకుంటున్నారు. ఎంతసేపు క్ర‌మ‌శిక్ష‌ణ‌, చ‌దువు, కెరీర్ అంటూ వాళ్ల‌ను ఒక బోనులో బందించేస్తున్నారు. చ‌దువు, కెరీర్ కావాల్సిందే కానీ దాన్ని చెప్పేందుకు పిల్ల‌ల ద‌గ్గ‌ర విల‌న్ లా మారిపోవాల్సిన అవ‌స‌రం లేదు. చిన్న‌త‌నం నుంచి హాస్ట‌ల్ లో పెరిగిన పిల్ల‌వాడికి అనుబంధాలు, ఆప్యాయ‌త‌లు ఏం తెలుస్తాయి? తాను పెద్ద‌య్యాక‌, త‌ల్లిదండ్రులు ముస‌లివాళ్లు అయ్యాక త‌న‌ను ఎలా అయితే హాస్టల్ లో ప‌డేసారో వాళ్ల‌ను కూడా అలాగే ఓల్డేజ్ హోమ్ లో ప‌డేస్తాడు. బాగా సెటిల్ అయి విదేశాల్లో ఉద్యోగం చేస్తున్న చాలా మంది ఇక్క‌డ త‌మ త‌ల్లిదండ్రుల‌ను వృద్ధాశ్ర‌మాల్లోనే జాయిన్ చేస్తున్నారు. ఎక్క‌డ త‌ప్పు జ‌రుగుతోంది? పిల్ల‌ల ఆలోచ‌నా విధానంలోనా? త‌ల్లిదండ్రుల పెంప‌కంలోనా? క‌చ్చితంగా త‌ల్లిదండ్రుల పెంప‌కంలోనే జ‌రుగుతోంది.

 

 

పిల్ల‌ల‌కు మ‌నం నిజ‌మైన విద్య‌నే నేర్పిస్తున్నామా?

 

సాధార‌ణంగా ప్ర‌తీ త‌ల్లిదండ్రులు త‌మ పిల్ల‌ల‌కు LSRW నేర్పిస్తారు. అంటే కేవ‌లం లెర్నింగ్, స్టడీ, రీడింగ్, రైటింగ్ మాత్రం చెపుతారు. ఇది పిల్ల‌ల మానసిక వికాసానికి అంత‌గా ఉప‌యోగ‌ప‌డ‌దు. మూస ప‌ద్ధ‌తిలో బ‌ల‌వంతంగా నేర్చుకునే విషయానికి ఎప్ప‌టికీ విలువ ఉండ‌దు. ప‌ల‌క‌పై అక్ష‌రాలు దిద్దుస్తున్నారు కానీ అస‌లు ప‌ల‌క అంటే ఏమిటో చెప్ప‌లేక‌పోతున్నారు. ప‌ల‌క‌ను ఇంగ్లీష్ లో స్లేట్ అంటారు అని తెలుసుక‌దా? అక్ష‌రాల‌ను నేర్చుకోవ‌డానికి పునాది వేసిన ప‌ల‌కలోని అస‌లైన వివ‌ర‌ణ‌ను తెలుసుకున్న‌ప్పుడు అస‌లైన విద్య‌ను నేర్చుకున్న‌ట్టు. SLATE అంటే సోష‌ల్, లీడ‌ర్ షిప్, అవేర్ నెస్, టెక్నిక‌ల్, ఎడ్యుకేష‌న్. స‌మాజం ప‌ట్ల అవ‌గాహ‌న‌తో ఒక విష‌యాన్ని సాంకేతిక దృక్కోణంతో చూసి నాయ‌కత్వంతో ముందుకు తీసుకెళ్లే విధంగా నేర్చుకునే చ‌దువు ఉండాలి. కానీ ఇప్పుడు ఆ విధంగా జ‌రుగుతుందా? చాలా మంది త‌ల్లిదండ్రులు త‌మ పిల్ల‌ల‌కు ఏది అవ‌స‌ర‌మో అది కాకుండా అన‌వ‌స‌ర‌మైన విష‌యాల‌ను ఇస్తున్నారు. దీని వ‌ల‌న ఇటు పిల్ల‌వాడి భ‌విష్య‌త్ తో పాటు త‌ల్లిదండ్రుల భ‌విష్య‌త్ కూడా ఇబ్బందులో ప‌డుతోంది.

 

 

ఈ త‌రం పిల్ల‌ల‌కు ప్ర‌కృతి అంటే తెలుసా?

 

ఎంత‌సేపూ చ‌దువుల ప‌రుగు పోటీల త‌మ పిల్ల‌ల‌ను ముందుంచాల‌నే ఆత్రం తప్పితే ఇప్ప‌టి త‌ల్లిదండ్రులు తాము ఎక్కడ పొర‌పాటు చేస్తున్నామో గుర్తించ‌లేక‌పోతున్నారు. పిల్ల‌ల ఎదుగుద‌ల ఎప్పుడూ ప్ర‌కృతితో మ‌మేకమై ఉండాలి. స‌హ‌జ సిద్ధంగా జ‌రిగే ప‌రిణామాలు, సాటి జీవులు, బ‌తుకు పోరాటం ఇవన్నీ పిల్ల‌లు చూసి, అనుభ‌వం చెంది మాత్ర‌మే నేర్చుకోగ‌లుగుతారు. పిల్ల‌ల‌కు అడ‌విని చూపించాల‌ని , అక్క‌డ కుద‌ర‌క‌పోయినా జూలో జంతువులను చూపించాల‌ని నిపుణులు చెపుతున్నారు. సాటి జీవుల ప‌ట్ల ప్రేమ, ఆహారాన్ని సంపాదించుకునేందుకు, గూడును ఏర్పాటు చేసుకునేందుకు అవి ప‌డే తప‌న అర్ధ‌మ‌వుతాయ‌ని అంటున్నారు. కానీ అలా ప్ర‌కృతిని చూసే అవ‌కాశం ఎంత మంది పిల్ల‌ల‌కు ఉంది. కాంక్రీట్ అర‌ణ్యాల్లో పెర‌గుతున్న వారి అర‌ణ్యాల గూర్చి ఏం తెలుస్తుంది. అడ‌వి, అక్క‌డ పచ్చ‌ద‌నం, జంతువులు ఇలా పిల్ల‌ల‌కు అన్ని విష‌యాల‌ను తెలియ‌జేయాల్సిన త‌ల్లిదండ్రులకు ఎంత సేపూ చ‌దువు చ‌దువు అంటూ పిల్ల‌ల‌ను రుద్ద‌డ‌మే స‌రిపోతోంది. ఇక పిల్ల‌వాడు ఎప్పుడు మానసికంగా ఎదుగుతాడు? ఎలాంటి ప‌రిణతి సాధిస్తాడు. క‌చ్చితంగా సాధించ‌లేడు. మెల్ల‌గా త‌న సున్నిత‌త్వాన్ని కోల్పోయి పెద్ద‌య్యాక త‌న త‌ల్లిదండ్రుల‌తో అలాగే ప్ర‌వ‌ర్తిస్తాడు. త‌మ‌ను త‌మ పిల్ల‌లు ఓల్డేజ్ హోమ్ ల‌లో ప‌డేస్తున్నార‌ని బాధ‌ప‌డే త‌ల్లిదండ్రులు త‌మ పెంప‌కంపై ఒక‌సారి స‌మీక్ష చేసుకోవాలి.

 

 

పిల్ల‌ల‌కు ఇవ్వాల్సింది బ్యాంక్ బ్యాలెన్స్ లు కాదు!

 

చాలా మంది త‌ల్లిదండ్రులు త‌మ పిల్ల‌ల కోసం రాత్రీ ప‌గ‌లు క‌ష్ట‌ప‌డి వారి కోసం బాగా డ‌బ్బు కూడ‌బెట్టాలి అనుకుంటారు. మీరు మీ పిల్ల‌ల‌తో మీరు నాణ్య‌మైన స‌మ‌యం గ‌డ‌ప‌లేన‌ప్పుడు మీరు వారి ఎంత డ‌బ్బు సంపాదించినా అది బూడిద‌లో పోసిన ప‌న్నీరే. పిల్ల‌లు త‌మ చిన్న‌త‌నంలో నాన్న త‌న‌తో గ‌డిపిన క్ష‌ణాల‌నే గుర్తుంచుకుంటారు కానీ మీరు సంపాదించిన డ‌బ్బులను కాదు. ఎందుకంటే క‌ష్ట‌ప‌డ‌కుండా వ‌చ్చిన డ‌బ్బుల‌ను చాలా మంది సరైన విధంగా ఉప‌యోగించుకోలేరు. ఏదైనా క‌ష్ట‌ప‌డి సంపాదించిన‌ప్పుడు దాని విలువ తెలుస్తుంది. ఒక ప్ర‌ముఖ యాడ్ లో ఇలా ఉంటుంది. మాట్లాడితే ప‌నులు జ‌రుగుతాయి. ఈ లైన్ పిల్ల‌ల పెంప‌కంలో క‌చ్చితంగా స‌రిపోతుంది. పిల్ల‌ల‌తో మ‌న‌స్సు విప్పి మాట్లాడండి. స్నేహితుల్లా ఉల్లాసంగా మాట్లాడండి. వారితో త‌గినంత స‌మ‌యం గ‌డ‌పండి. ఆ గ‌డిపిన క్ష‌ణాలు వారికి జీవితాంతం గుర్తుండిపోయేలా వ్య‌వ‌హ‌రించండి. మీ పిల్ల‌ల‌కు మీరిచ్చే అద్భుత‌మైన కానుక ఇదే. అలా కాకుండా వారిని ఆదేశిస్తూ, ఫ‌లానా ప‌ని చేయాల‌ని శాసిస్తూ ఉంటే చివ‌ర‌కు వృద్ధాప్యంలో మీకు కూడా అటువంటి ప‌రిస్థితే ఎదుర‌వుతుంది.

 

( ఈ ఆర్టిక‌ల్ ను మీకు స్పాన్స‌ర్ చేస్తున్నవారు)

 

 

పేరెంట్స్ ఓవర్ యాక్షన్..పిల్లలకు రియాక్షన్!

 

ప్రస్తుత ఆధునిక యుగంలో భార్యాభర్తలు ఇద్దరూ ఉద్యోగం చేస్తున్నారు. ఉమ్మడి కుటుంబాలు దాదాపుగా కనుమరుగు కావడంతో ఉన్న ఒకరిద్దరు పిల్లల్ని తల్లిదండ్రులే జాగ్రత్తగా చూసుకోవాల్సిన పరిస్థితి ఏర్పడింది. అయితే పెంపకంలో పేరెంట్స్ తమకు తెలియకుండానే ఒక తప్పు చేస్తూ పిల్లల్ని చేజేతులూ మొండి వాళ్లుగా మారుస్తున్నారు. ఇది చూడటానికి చాలా చిన్న విషయమే కానీ పేరెంట్స్ తమ వైఖరి మార్చుకోకుంటే అది పెను సమస్యగా మారే ప్రమాదం ఉంది. తిండి తినిపించే విధానంలో మనం చేస్తున్న పొరపాట్లు పెంపకంలో పెద్ద సమస్యలుగా మారుతున్నాయి. చాలా మంది తల్లులు పిల్లలకు ఆహారం పెట్టే విషయాన్ని ఒక పెద్ద తతంగంలా మారుస్తున్నారు. వాళ్లు తిండి తినడం లేదని బాధపడిపోతూ ఎప్పుడూ వాళ్ల తిండి మీదే ధ్యాస పెట్టి పిల్లల్ని మొండివాళ్లుగా మారుస్తున్నారు. తిండి విషయంలో పిల్లల స్వేచ్ఛను హరిస్తూ వాళ్ల మానసిక అభివృద్ధికి అవరోధంగా మారుతున్నారు.

 

 

తిండి పెట్టడాన్ని ఓ తతంగంలా మార్చకండి!

 

ప్రస్తుతం చాలా మంది తల్లులు పిల్లలకు తిండి పెట్టడాన్ని ఒక పెద్ద కార్యక్రమంలా చూస్తున్నారు. వాళ్లకు బలవంతంగా తిండి తినిపించాలని ప్రయాస పడుతున్నారు. వాళ్లకు ఆకలిగా ఉందా ? లేదా? అన్న విషయాన్ని చూడకుండా పిల్లలకు ఎలాగైనా తిండి తినిపించాలన్న ఆత్రంతో వాళ్లకు బలవంతంగా తిండిని కుక్కుతున్నారు. పిల్లలకు సరైన ఆహారం పెట్టాలన్న పేరెంట్స్ ఆలోచన అర్ధం చేసుకోదగిందే. కానీ పిల్లలకు ఇష్టం ఉన్నా లేకున్నా ఎలాగైనా తిండి పెట్టాలన్న ఆత్రం సమస్యలు తెచ్చిపెడుతోంది. పిల్లలకు ఆకలి వేసే సమయానికి అన్నీ సమకూర్చి పెట్టాలి. వాళ్ల తిండి వాళ్లు తినేలా చూడాలి. అంతేకానీ ఎప్పుడూ తినమని చెపుతుంటే వాళ్లు స్వేచ్ఛ కోల్పోతున్నట్టు భావిస్తారు. ఇంట్లో తినని పిల్లలు పక్కింటికి వెళ్లినప్పుడు బాగా తినడం మనం గమనిస్తూ ఉంటాం. ఎందుకంటే అక్కడ ఎవరూ వాళ్లను తినమని బలవంత పెట్టరు. వాళ్లకు నచ్చినట్టు తింటారు. ఇంట్లో కూడా అటువంటి పరిస్థితి కల్పించాలి.

 

 

పిల్లలు మిమ్మల్ని ఏమోషనల్ గా బ్లాక్‌మెయిల్ చేస్తారు!

 

చాలా మంది పేరెంట్స్ పిల్లలకు ఏలాగైనా తిండి పెట్టాలనే ఉద్దేశంతో వాళ్లపై వరాల జల్లులు కురిపిస్తూ ఉంటారు. నువ్వు ఇప్పుడు అన్నం తింటే ఫలానా వస్తువు కొనిపెడతా, అక్కడికి తీసుకువెళతా ఇలా చెప్పి వాళ్లతో తిండి తినిపించేందుకు ప్రయత్నిస్తూ ఉంటారు. అది సరైన పద్ధతి కాదు. ఎందుకంటే ఇలాంటి వరాలు పిల్లల్లో విపరీత ధోరణులను పెంచుతాయి. యస్..నేను ఇప్పుడు తిననని మారాం చేస్తే ఇవన్నీ నాకు సమకూరుతాయి. వాళ్లను బతిమాలించుకుంటే నాకు కోరినవన్నీ లభిస్తాయి. అన్న ధోరణిలోకి వెళ్లిపోతారు. పిల్లల్లో అలాంటి ఆలోచనలు లేకుండా జాగ్రత్త పడాలి. పూర్వం ఉమ్మడి కుటుంబంలో పిల్లలే వచ్చి తల్లిదండ్రులను ఆకలి వేస్తోంది అన్నం పెట్టండి అని అడిగే వారు. వాళ్లు అడిగిన తర్వాత తల్లి వారికి భోజనం పెట్టేది. మరి ఇప్పుడు ఎందుకు పరిస్థితి తారుమారైంది. ఆర్థికంగా ఎదగడంతో ఇంట్లో అపరిమితంగా తినుబండారాలు ఉంటున్నాయి. అదే సమయంలో ఒకరిద్దరే పిల్లలే కావడంతో గారాబం పెరిగిపోతోంది. ఇటువంటి పరిస్థితుల్లో వాళ్లకు ఆకలి తెలిస్తే , స్వేచ్ఛనిస్తే వాళ్ల తిండి వాళ్లే తింటారు. పేరెంట్స్ ప్రత్యేకంగా తినిపించాల్సిన అవసరం లేదు.

 

‘నా కోసం తింటున్నాను’ అన్న భావన కలిగించాలి!

 

ఈ సమస్త ప్రకృతిలో ఈ జీవి కూడా తన పిల్లలకు అన్నం కలిపి నోట్లో తిండి పెట్టదు. తమ పిల్లలకు ఆహారం సమకూర్చి దాన్ని వారే ఎలా తినాలో నేర్పిస్తాయి. ఎందుకంటే ప్రతీ జీవికి తన ఆకలి తనకు తెలుస్తుంది. తన ఆకలి తనకు తెలిసినప్పుడు తమకు కావాల్సిన ఆహారాన్ని అడిగి తినేలా వాతావరణాన్ని తల్లిదండ్రులు కల్పించాలి. అలా కాకుండా అస్తమాను పిల్లలకు తిండి తినిపించడం అనే కార్యక్రమం పెట్టుకుంటే వాళ్లు నా కోసం కాదు. మా అమ్మ, నాన్న కోసం తింటున్నాం అనే భావనలోకి జారిపోతారు. పిల్లలకు ఇష్టమైన ఆహారం, మంచి పుష్టికరమైన ఆహారం అందుబాటులో ఉంచి వాళ్లు అడిగినప్పుడు దాన్ని అందించాలి తప్పితే వాళ్లకు నోట్లో కుక్కితే పరిస్థితి వికటిస్తుంది. తిండి తినే విషయంలో పిల్లలకు ఎనలేని స్వేచ్ఛను కల్పించాలి. చిలుకను బంగారు పంజరంలో పెట్టి అన్ని రకాల పండ్లను పెడితే ఉపయోగం ఏంటి? దాన్ని బయటకు వదిలేస్తే అది వెళ్లి తనకు నచ్చిన పండ్లు తింటుంది. అప్పుడే ఆ చిలుకకు నిజమైన ఆనందం.

 

 

పరిష్కారాలు మన చేతుల్లోనే ఉన్నాయి!

 

అమెరికా వంటి దేశాల్లో పిల్లవానికి ఏడాది వయస్సు దాటగానే తల్లిదండ్రులు ఇక ఆహారం నోట్లో పెట్టే పని పెట్టుకోరు. వాళ్లను ఒక కుర్చీలో కూర్చొబెట్టి వాళ్ల ముందు ఒక గిన్నెను ఉంచుతారు. మొదట్లో ఇబ్బందులు పడినా వాళ్ల తిండి వాళ్లు తినడం పిల్లలు అలవాటు చేసుకుంటారు. అలాగే ఆహారం పెట్టేటప్పుడు తల్లులు ఆందోళన , కోపం, తిట్టడం వంటి పనులు చేయకూడదు. ఇలా తల్లి విసుక్కుంటే పిల్లలు తిండి అంటే విముఖత పెంచుకుంటారు. పిల్లలు ఎత్తుకు తగ్గ బరువు ఉన్నారో లేదో చూసుకోవాలి. వాళ్లు ఆరోగ్యంగా ఉన్నప్పుడు కూడా తిండి తినడం లేదంటే వాళ్లకు తిండి ఎక్కువైంది అని అర్ధం. తిండి తినకపోతే ఓ నాలుగైదు గంటలు గ్యాప్ ఇచ్చి అప్పుడే తిండి పెట్టండి. తాము తినకపోతే తల్లిదండ్రులు దృష్టంతా తమ మీదే ఉందన్న భావన వాళ్లకు కలిగించకూడదు. ఎందుకంటే తమ కోసం తాము తినాలన్న ఆలోచన పిల్లలకు తల్లిదంద్రులు కలిగించాలి.

 

(ఈ ఆర్టికల్ ను మీకు స్పాన్సర్ చేసినవారు) 

 

 

పిల్ల‌లు చెప్పింది పెద్ద‌లు వినాలి!!

 

పిల్ల‌ల‌కు తల్లిదండ్రులే ఆది గురువులు. స్కూల్ కు వెళ్ల‌కుముందు వెళ్లిన త‌ర్వాత కూడా పిల్ల‌లు చాలా విష‌యాల‌ను త‌ల్లిదండ్రుల నుంచే నేర్చుకుంటారు. ఆత్మ‌విశ్వాసం, ఆస‌క్తి, మ‌ర్యాద‌, శ్ర‌ద్ధ ఇలా ఏ విష‌య‌మైనా పిల్ల‌లు పేరెంట్స్ నే ఆద‌ర్శంగా తీసుకుంటారు. పిల్ల‌ల‌కు ఆద‌ర్శంగా ఉండ‌టం అనేదే పేరెంటింగ్ లో అతిముఖ్య‌మైన స‌వాలు. ఈ స‌వాలును స్వీక‌రించి నిజాయితీతో, గౌర‌వంతో, ఆద‌ర్శ‌ప్రాయ‌మైన జీవన విధానాన్ని ఎవ‌రు ఆచ‌రిస్తారో వాళ్ల పిల్ల‌లు మాత్ర‌మే ఆరోగ్య‌క‌ర‌మైన వాతావ‌ర‌ణంలో పెరుగుతున్న‌ట్టు. ముఖ్యంగా కొత్త‌గా బ‌య‌టి ప్ర‌పంచంలోకి వెళ్లిన‌ప్పుడు పిల్ల‌ల చిన్ని బుర్ర‌లో ఎన్నో సందేహాలు, ప్ర‌శ్న‌లు పుడ‌తాయి. వాటిని జాగ్ర‌త్త‌గా త‌మ చిన్ని బుర్ర‌లో దాచుకుని వాటికి స‌మాధానాలు చెప్ప‌మ‌ని త‌ల్లిదండ్రుల‌ను అడుగుతారు. కానీ కెరీర్ కే అధిక ప్రాధాన్య‌త‌నిస్తున్న ఈ త‌రం త‌ల్లిదండ్రులకు పిల్ల‌ల సందేహాల‌ను తీర్చేందుకు స‌మ‌య‌మూ, ఓపిక రెండూ ఉండ‌టం లేదు. ఈ ప‌రిణామం పిల్ల‌ల మానసిక ఎదుగుద‌ల‌పై తీవ్ర ప్ర‌భావాన్ని చూపిస్తుంది.

 

 

పేరెంటింగ్ లో మొద‌టి మెట్టు ఓపిక‌ను పెంచుకోవ‌డ‌మే!

 

 

ఒక జంట పిల్ల‌ల్ని క‌న‌డానికి సిద్ధ‌మ‌వ‌డం అంటే త‌మ‌ను తాము పూర్తిగా మార్చుకోవ‌డానికి సిద్ధ‌ప‌డ‌ట‌మే. ఎందుకంటే ప్ర‌స్తుత కాలంలో పిల్ల‌ల్ని పెంచ‌డం అనేది ఆషామాషీ విష‌యం కాదు. శారీర‌కంగా, మాన‌సికంగా పూర్తి స్థాయిలో సంసిద్ధ‌మైతేనే ఈ పెద్ద‌ బాధ్య‌తను విజ‌య‌వంతంగా నిర్వ‌ర్తించేందుకు వీలు క‌లుగుతుంది. ముఖ్యంగా వైఖ‌రి ప‌రంగా భావోద్వేగాల‌ను అదుపు చేసుకుని ఓపిక‌ను పెంచుకోవ‌డ‌మే పిల్ల‌ల పెంప‌కంలో మొద‌టి మెట్టు. ఎందుకంటే శైశ‌వ ద‌శ నుంచి కౌమారం వ‌ర‌కూ పిల్ల‌లు ప్ర‌తీ క్ష‌ణం తల్లిదండ్రుల ఓపిక‌కు ప‌రీక్ష పెడుతూనే ఉంటారు. ముఖ్యంగా అప్పుడే స్కూల్ కు వెళ్తున్న పిల్ల‌లు త‌ల్లిదండ్రుల ఓపిక‌ను ప‌రీక్షిస్తారు. తాము చూసిన తాము నేర్చుకున్న విష‌యాల‌ను ఇంటికి రాగానే త‌ల్లిదండ్రుల‌కు గుక్క తిప్పుకోకుండా చెపుతారు. ఎన్నో ప్ర‌శ్న‌లు అడుగుతారు. అలాగే తాము నేర్చుకున్న విష‌యాన్ని త‌ల్లిదండ్రుల ద‌గ్గ‌ర ప్రద‌ర్శించ‌డానికి ఆస‌క్తి చూపిస్తారు. అయితే వాళ్ల ఉత్సాహాన్ని చాలా మంది పేరెంట్స్ నీరుగారుస్తారు. వాళ్ల చెప్పే విష‌యాల‌ను వినేందుకు ఓపిక లేక వాళ్ల‌పై చిరాకు ప‌డ‌తారు.

 

 

పిల్ల‌ల మాట‌ల ప్ర‌వాహానికి అడ్డుక‌ట్ట వేయ‌కండి!

 

పిల్లలు ఉత్సాహంగా చెపుతున్న విష‌యాలకు, క‌బుర్ల‌కు, ప్ర‌శ్న‌ల‌కు అస్స‌లు అడ్డుక‌ట్ట వేయ‌కండి. వాళ్లు చెప్పింది శ్ర‌ద్ధగా , ఆస‌క్తిగా వినండి. ఆ వినడంలో ఒక‌ర‌క‌మైన ఉత్సాహాన్ని చూపించండి. తాము చెపుతున్న విషయం త‌ల్లి లేదా తండ్రి ఆస‌క్తిగా విన‌డం అన్న‌ది పిల్ల‌లకు ఆనందాన్ని క‌లిగిస్తుంది. పిల్ల‌లు అడిగే ప్ర‌శ్న‌ల‌కు విసుగు క‌న‌బ‌ర్చ‌కుండా ప్రేమ‌తో స‌మాధానాలు చెప్పాలి. వాళ్లు అడిగిన ప్ర‌శ్న‌నే ప‌దే ప‌దే అడుగుతున్నా స‌రే. చిరాకును ప్ర‌ద‌ర్శించ‌కూడ‌దు. పిల్ల‌లు మిమ్మ‌ల్ని ప్ర‌శ్న‌లు అడుగుతున్నారు అంటే బ‌య‌ట ప్ర‌పంచంలో వాళ్లు చాలా విష‌యాల‌ను చూసి అవి ఏంటి అనే జిజ్ఞాస‌ను పెంచుకుంటున్నార‌ని అర్ధం. అన్నీ తెలుసుకోవాల‌న్న వాళ్ల జిజ్ఞాస‌ను ఆదిలోనే చిదిమేయ‌కండి. ఎంత బిజీగా ఉన్నా స‌రే వాళ్లు అడిగే ప్ర‌శ్న‌ల‌కు ఓపిగ్గా స‌మాధానం చెప్పాలి. వాళ్లు చెప్పే విష‌యాల ద్వారా స్కూల్ బ‌స్ లోనూ, స్కూల్ లోనూ, ట్యూష‌న్ లోనూ ఏం జ‌రుగుతుందో తెలుసుకునేందుకు వీలు క‌లుగుతుంది. ఏదైనా అస‌హ‌జంగా అనిపిస్తే వెంట‌నే త‌గిన చ‌ర్య‌లు తీసుకునేందుకు ఇది ఉప‌యోగ‌ప‌డుతుంది.

 

 

మీరు విన‌కుంటే ఇక చెప్ప‌డం మానేస్తారు!

 

త‌మ స్కూల్ లో బ‌య‌ట జ‌రిగిన విష‌యాల‌ను, చూసిన సంఘ‌ట‌న‌ల‌ను పిల్ల‌లు చెపుతున్న‌ప్పుడు శ్ర‌ద్ధ‌గా విన‌డం ఒక్క‌టే కాదు వాళ్లు వాస్త‌వానికి ఏం చెప్పాల‌నుకుంటున్నారో అర్ధం చేసుకోవాలి. నాలుగైదు సంద‌ర్భాల్లో మీరు స‌రైన ప్ర‌తిస్పంద‌న లేకుండా వాళ్లు చెప్పిన విష‌యాన్ని విన‌డం లేద‌ని తెలిస్తే పిల్ల‌లు ఇక మీతో ఏ విష‌యం చెప్ప‌డం మానేస్తారు. అది దీర్ఘ‌కాలంలో మీకు మీ పిల్ల‌ల మ‌ధ్య దూరాన్ని పెంచుతుంది. అలా జ‌ర‌గ‌కుండా ఉండాలంటే మీ పిల్ల‌ల‌కు ఒక మంచి స్నేహితునిలా వాళ్లు చెప్పింది వింటూ స‌రైన స‌మాధానం , స‌ల‌హా ఇచ్చే స‌న్నిహితుని పాత్ర పోషించాలి. అలా మీకు ఫ్రెండ్స్ లా ఉంటేనే పిల్ల‌లు మీతో ఏదైనా విష‌యం చెపుతారు. మీరు వారు చిన్న ప్ర‌శ్న‌ల‌కు , స‌రైన స‌మ‌యానికి వాళ్ల‌కు కావాల్సి వ‌చ్చే స‌ల‌హాల‌ను ఇచ్చేందుకు మీరు అందుబాటులో లేకుంటే వాళ్లు కొత్త స్నేహితుల‌ను వెతుక్కుంటారు. వాళ్ల ప్ర‌శ్న‌లు, వాళ్ల బాధ‌ల‌ను చెప్పుకునేందుకు వేరే వాళ్ల‌ను వెతుక్కుంటారు. ఆ స్నేహితులు చెడ్డ వాళ్లు అయితే మీ పిల్ల‌లు కూడా చెడు దారిలోకి వెళ్లిపోతారు.

 

 

శిక్ష‌ణ‌తో రాటుదేలేలా చేయండి!

 

పిల్ల‌ల‌కు వారి వ‌య‌స్సుకు త‌గిన‌ట్టుగా ఏదైనా ఒక విష‌యంపై శిక్ష‌ణ ఇవ్వండి. అది క‌రాటే, కుంగ్ ఫూ, మ్యూజిక్, చిత్ర‌లేఖ‌నం ఏదైనా కావ‌చ్చు. ఇలా ఓ కొత్త విష‌యం, కొత్త ఆట‌, కొత్త నైపుణ్యం నేర్చుకోవ‌డం వ‌ల‌న పిల్ల‌ల్లో ఆత్మ‌విశ్వాసం పెరుగుతుంది.వాళ్ల‌కు సంబంధించిన చిన్న ప‌నులు వారే సొంతంగా చేసుకునేలా వాళ్ల ప‌నిపై వాళ్లే నిర్ణ‌యాలు తీసుకునేలా వాళ్ల‌ను ప్రొత్సాహించాలి. దీనివల‌న చిన్న‌తనం నుంచే త‌మ ప‌నులు తాము చేసుకోవ‌డం చిన్న ప‌నుల‌కు త‌ల్లిదండ్రుల మీద ఆధార‌క‌ప‌డ‌పోవ‌డం వాళ్ల‌కు అల‌వాట‌వుతాయి. అదే విధంగా వ‌య‌స్సుకు త‌గిన‌ట్టు వాళ్ల‌కు కొత్త పుస్త‌కాలు చ‌దివే అలవాటును కూడా నేర్పించాలి. విజ్ఞానం పెర‌గ‌డం అనేది వాళ్ల‌కు ఆత్మ‌విశ్వ‌సాన్నే కాదు ఒక విష‌యాన్ని విభిన్న కోణాల్లో చూసే శ‌క్తి వ‌స్తుంది. పిల్ల‌ల‌తో ఎప్పుడూ స్నేహితుల్లా ఉంటూ వారు అడిగే ప్ర‌శ్న‌లు విసుగు లేకుండా స‌మాధానం చెప్పిన‌ప్పుడే పెంప‌కంలో కీల‌క‌మైన ద‌శ‌లో విజ‌య‌వంత‌మైన‌ట్టు.

 

(ఈ ఆర్టిక‌ల్ ను మీకు స్పాన్స‌ర్ చేస్తున్న‌వారు)