ప్రస్తుత పరిస్థితుల్లో ఉద్యోగులు తీవ్రమైన పని ఒత్తిడిలో విధులు నిర్వర్తిస్తున్నారు. ముఖ్యంగా టార్గెట్లు, నివేదికలు, బాసిజం వంటివి ఉద్యోగులపై మానసిక ఒత్తిడిని పెంచుతున్నాయి. కార్పోరేట్ రంగంలో పనిచేస్తున్న వారైతే మరింతగా పని ఒత్తిడికి గురవుతున్నారు. దీంతో చాలా మంది ఉద్యోగులను శారీరక సమస్యలకు తోడు మానసిక సమస్యలు కూడా వేధిస్తున్నాయి. మెల్లగా మొదలయ్యే ఈ సమస్య తగిన జాగ్రత్తలు తీసుకోకపోవడంతో తర్వాత పెను సమస్యగా మారుతోంది. ముఖ్యంగా ఆఫీస్ లో పని ఒత్తిడి ఊబకాయానికి దారితీస్తోందని తాజా అధ్యయనాలు తేల్చి చెపుతున్నాయి. ఒక్కసారి ఊబకాయం వస్తే ఆ తర్వాత రక్తపోటు, షుగర్ వంటి వ్యాధులు మెల్లగా శరీరంలోకి ప్రవేశిస్తున్నాయి. దీంతో పనిచేసే వయస్సు, సత్తా ఉండగానే చాలా మంది అనారోగ్యం పాలవుతున్నారు. ఎంత పని ఒత్తిడిలో ఉన్నా వ్యాయామానికి తగిన సమయం కేటాయించడం, సరైన పద్ధతిలో సరైన తిండి తినడం వలన ఆరోగ్యాన్ని కాపాడుకోవచ్చు. లేదంటే ఎంత ఉన్నత స్థితిలో ఉన్నా ఎంత శాలరీ తీసుకుంటున్నా అదంతా ఎందుకూ కొరగానిదిగానే మారుతుంది. ఒత్తిడిని దరి చేరనీయకుండా ఆరోగ్యవంతమైన జీవనశైలిని అవలంభించినప్పుడే కెరీర్ లోని మజాను ఆస్వాదించేందుకు వీలు కలుగుతుంది.
ఉద్యోగుల వెన్ను విరుస్తున్న పని ఒత్తిడి!
అసలు మనుష్యు జీవనంలో ఒత్తిడి అనేది ఒక భాగం. ఆదిమ కాలం నుంచి మనిషి ఒత్తిడిలోనే మనుగడ సాగిస్తున్నాడు. అయితే ఈ ఆధునిక కాలంలో మనిషి ఎందుకు ఒత్తిడిని ఎదుర్కోలేకపోతున్నాడు. దీనికి ఒకటే కారణం మారుతున్న జీవనశైలి. ప్రజంట్ ట్రెండ్ లో టార్గెట్లను అనుసరించి పనిచేయాల్సి ఉంటుంది. పోటీ వాతావరణంలో ప్రత్యర్ధులను ఎదుర్కోవాలన్న, కస్టమర్ కు అత్యుత్తమ సర్వీస్ ను అందించాలన్నా టార్గెట్ అనేది చాలా కీలకమైన విషయమే. అయితే అనుకున్న గడువులోగా పూర్తి కావాలన్న ఆ ఒత్తిడి ఉద్యోగులపై తీవ్రంగా ప్రభావం చూపుతోంది. ఫలితమే మానసిక కుంగుబాటు, ఊబకాయం వంటి అనారోగ్య సమస్యలు. ముఖ్యంగా కార్పోరేట్ ఆఫీసుల్లో పనిచేసే వారు ఈ విధమైన పని ఒత్తిడి గురవుతున్నారు. మంచి శాలరీ వస్తున్నా గడువు లోగా పని పూర్తి చేయాలన్న ఒత్తిడి వాళ్ల ఆరోగ్యానికి ప్రతికూలంగా మారుతోంది. ఒకే చోట కూర్చుని పనిచేయడానికి తోడు శారీరక వ్యాయామం లేకపోవడం, మానసిక ఒత్తిడి పెరిగిపోవడంతో అది కాస్తా ఊబకాయానికి దారితీస్తోంది. మరోవైపు ఒత్తిడితో అధికంగా తినడం, జీవ క్రియ వేగం మందగించడం వంటి కారణాలు కూడా ఒబేసిటీకి కారణమవుతున్నాయి. దీంతో యవ్వనంలోనే చాలా మంది వయసు మళ్లిన వ్యక్తుల్లా కనబడుతున్నారు. అనారోగ్య సమస్యలు చుట్టుముట్టడంతో నెలకు రెండుమూడు సార్లు డాక్టర్లను సంప్రదించాల్సి వస్తోంది. ఈ పరిణామం వ్యక్తిగత ఎదుగుదలతో పాటు కంపెనీ ఉత్పాదకతకు పెద్ద అవరోధంగా మారుతోంది.
ఒత్తిడి కొవ్వును పెంచుతోంది!
నిపుణులైన మెటబాలిక్ సర్జన్స్ చెపుతున్న విషయాన్ని చూస్తే ఒత్తిడి అనేది శరీరంలో అదనపు కొవ్వును విడుదల చేస్తోంది. ఒత్తిడితో అదనంగా విడుదలైన కొవ్వు స్థాయిలు సరైన శారీరక శ్రమ లేకపోవడంతో శరీరంలో పేరుకుపోతున్నాయి. ఫలితంగా ఊబకాయం వస్తోంది. అన్ని వైద్య నివేదికలు తేల్చి చెప్పిన విషయమేమిటంటే పని ఒత్తిడి అనేది శరీరంలో కొవ్వు పేరుకుపోయేలా చేస్తుందని. ఇటువంటి పరిస్థితుల్లో తగిన జాగ్రత్తలు తీసుకోకుంటే ఆరోగ్యం పెను ప్రమాదంలో పడే అవకాశముంది. ఈ విషయాన్ని కంపెనీలు కూడా గుర్తించి కొన్ని చర్యలు చేపట్టాయి. ఉద్యోగుల ఆరోగ్యంపై కంపెనీలు తీసుకుంటున్న చర్యలు ఎప్పుడూ అరకొరగానే ఉంటాయి. ఈ విషయంలో ఉద్యోగులు తమ వ్యక్తిగత ఆరోగ్యంపై తామే తగిన జాగ్రత్తలు తీసుకోవాల్సిన అవసరముంది. ఒత్తిడిని అధిగమించేందుకు పనిలో కొన్ని మార్పులు చేసుకోవడంతో పాటు జీవనశైలిని మార్చుకునేందుకు అందుబాటులో ఉన్న అన్ని చర్యలు చేపట్టాలి. అవసరమైతే ముందస్తుగా డాక్టర్లను సంప్రదించి ప్రారంభ దశలోనే పని ఒత్తిడిని తగ్గించుకునే ప్రయత్నం చేయాలి.
సరైన ప్రణాళిక ఉంటే ఆరోగ్యం మీ చేతుల్లోనే!
ప్రస్తుతం పెద్ద ఉద్యోగాలు చేస్తున్నారు, పెద్ద జీతాలు తీసుకుంటున్నారు. కానీ వ్యక్తిగత ఆరోగ్యంపై ఎవరికీ సరైన అవగాహన లేదు. ముఖ్యంగా ఆహారం, వ్యాయామంపై మన దేశంలోని యువతకు కనీస అవగహన ఉండటం లేదు. శారీరక శ్రమ యొక్క ప్రాధాన్యతను గుర్తించడంలో ప్రతీ ఒక్కరు విఫలమవుతున్నారు. ఫలితమే ఈ ఒత్తిడి. గతంలో ప్రతీదానికి శారీరక శ్రమ చేస్తూ ఆహారాన్ని సంపాదించుకునే వారు. దాని వలన జీవ క్రియల వేగం పెరిగి మనిషి ఆరోగ్యంగా ఉండేవాడు. ఇప్పుడు అసలు కూర్చున్న చోటికే అన్ని అందుబాటులోకి రావడం వలన శారీరక శ్రమ అన్నదే లేకుండా పోతోంది. దీనికి తోడు మానసికంగా ఒత్తిడికి గురికావడంతో అదుపు తప్పి తిని ఒంట్లో కొవ్వు పెరిగేలా చేసుకుంటున్నారు. తన శరీరంపై, తను తింటున్న తిండిపై అదుపు లేనప్పుడు కెరీర్ లో ఎంత ఎదిగిలా అది సరైన ఎదుగుదల కాబోదు. మంచి ఆరోగ్యకరమైన జీవన విధానాన్ని అలవర్చుకుని ప్రతీ రోజూ కొంత సమయాన్ని వ్యాయామానికి కేటాయించి సరైన పద్ధతిలో తిన్నప్పుడు ఆఫీస్ ఎంత పని ఒత్తిడి ఉన్నా అది ఆరోగ్యంపై ప్రభావం చూపదు.
(ఈ ఆర్టికల్ ను మీకు స్పాన్సర్ చేసినవారు)